Ngemutarka pekara nya enda tau enda digaga entara perintah ngambika ulih ditetapka
KUCHING: Penanggul minyak enggau gis ke nyadi baka kediatu semina ulih dikemutarka entara perintah menua enggau perintah besai.
Penganalisis Politik Datuk Peter Minos madahka pemutar entara perintah nya berat ngambika ulih ditetapka.
“Enti Chong Chieng Jen, Menteri Besai tauka Menteri Wang, nyangka rayat Sarawak nerima jaku iya laban iya ngarika Perintah Besai tang iya bejaku atas penuduk iya ke nyadi chairman Pakatan Harapan (PH) Sarawak enggau Parti Tindakan Demokratik (DAP) Sarawak.
“Pekara bekait enggau minyak enggau gis baka kediatu semina ulih dikemutarka entara Perintah, iya nya perintah menua enggau perintah besai, ngambika iya ulih ditetapka,” ku iya.
Iya madah munyi nya lebuh nimbal jaku Chong bedau lama tu tadi ke bejaku pasal ‘Tawaran Baru’ PH Sarawak senentang mayar royalti minyak enggau gis ngagai Sarawak.
Minos madah pekara nya tau nyadi siti penyalah ke barang piak ke ngambu tauka ngaga diri madah diri ngarika Perintah Besai dataika tauka kelimpah ari seiku sigi dipadu ulih Menteri Besai tauka kabinet perintah besai.
Nya alai, rayat Sarawak tau beratika pekara nya diri empu ba semaya sereta janji Chong.
“Jaku Chong bekait enggau pekara minyak enggau gis bebelit lalu suah endar berubah lalu nyaru penemu ke ngasuh mensia mayuh bingung sereta ringat.
“Nama kebuah enda meri pemadah nya enggau terang sereta muntang agi diperundingka. Sarawak berat begunaka pemisi wang ke ulih dikena menua tu mansang sereta maju ngipak enggau bemacham pekara sereta dukut enggau Semenanjung Malaysia,” ku iya.
Ku iya, Sarawak begunaka pemisi wang ke mayuh kena ngaga projek rama, pelajar, infrastruktur sereta ekonomi di mengeri sereta menua pesisir.
Ungkup ari perintah besai ku iya, ari taun 1963 sigi enda chukup lalu pedis ngulihka ungkup nya.
Nya alai ku iya, rayat Sarawak enggau perintah menua Sarawak begunaka mayuh agi ungkup asil ari pemisi minyak enggau gis ke dikembuan menua tu.
“Tu utai kedeka rayat sereta perintah Sarawak ke minta Perintah Besai nemu sereta berundingka pekara tu.
“Penyampau (Pemisi) ke diulih Sarawak ari perintah besai enggau Petronas ari 1974 enda mayuh tauka enda chukup kena ngenyampatka pemansang rama enggau ekonomi Sarawak,” ku iya.
Ketegal nya, ku iya, Sarawak minta bayar ke mayuh agi ari Petronas lalu dawa nya sigi ngipak sereta tetap.
Iya nandu baru madahka enti Petronas enggau perintah besai kelalu bingkin enggau peminta Sarawak sereta enda ibuhka pemerat Sarawak kena ngulihka ungkup nya kena ngaga pemansang asil minyak enggau gis menua tu, rayat menua tu ngasaika diri empu enda dikibuhka sereta enda lantang ati.
“Chong enda tau enda netap lalu nemu pemerat ke bendar rayat Sarawak, lalu ukai bepelasarka retorik sereta politik bekait enggau pekara minyak enggau gis nya,” ku iya.
Pekara bekait enggau minyak enggau gis baka kediatu semina ulih dikemutarka entara Perintah, iya nya perintah menua enggau perintah besai, ngambika iya ulih ditetapka. Datuk Peter Minos Penganalisis Politik