Orang ke ngemansangka pengawa berumah sereta ejensi penerit adat patut neritaka OP

KUCHING: Orang ke ngemansangka pengawa berumah sereta ejensi penerit adat di menua tu ditesau neritka ungkup sereta atur lebuh nyerahka rumah ngagai pemeli rumah.

Lebuh bejaku pasal pekara nya, Pegawai Khas Opis Menteri Opis Kandang Menua enggau Pengawa Berumah, Voon Shiak Ni madah, tu laban pengelikun orang ke bempu rumah nyadi pemerat opis menteri nya.

“Opis kami bisi dilawa ulih sida ke meli rumah, ke udah nyadi alai sida iya diau, nadai ngembuan ‘Occupation Permit’ (OP). Bisi mega kes nyadi lebuh pemeli rumah diasuh ngambi kunchi rumah tang OP nadai dikeluarka,” ku Voon ti mega nyadi mandal presiden nasional Indu PKR ba aum pengarang berita ditu, kemari.

Voon madahka pekara tu berat laban nya bisi bekait enggau pengelikun pengguna ke diau ba rumah nya.

“Semua pengguna ke udah bisi rumah deka meda rumah sida nya likun endur diau. Nya alai, bisi pemerat ba pengawa ngaga rumah enda tau enda nitihka semua atur pengelikun.”

Ku iya, rumah nya disah tembu lalu ulih alai endur diau enti OP udah dikeluarka, ke mandangka rumah nya likun endur diau.

“Pengguna tauka pemeli rumah meseti nemu empas lebuh diau ba rumah ke nadai OP. Nyema bisi penusah nyadi baka rumah angus, sida iya enda ulih ngaga kelim insuran.

“Lalu pekara nya bisi empas ba atur jual enggau beli laban lun ke di ijau ari bank pan pedis deka beulih enti nadai OP,” ku iya.