See: PH deka mutarka penyaru penemu sentang royalti minyak
KUCHING: Mandal Chairman Parti Keadilan Rakyat ( PKR) Sarawak See Chee How madahka jaku bantah sereta timbal ke negatif bala raban politik ari kem penyakal bekait enggau pekara royalti minyak nya normal lalu pemesai Pakatan Harapan (PH) patut belajar ari timbal nya lalu nyingkang ke mua.
See ke ngaku pasal pekara nya madahka, mayuh endar pekara bekait enggau royalti minyak enggau gis nya munyi ke nyaru penemu, tang iya madah pemerat kediatu PH ulih ngemutarka pekara nya, ke pemaik Sarawak.
“Keterubah iya dalam kandang 43 taun tu, ari taun 1976, Perintah Besai PH ngambi singkang tu deka meri lebih ari lima peratus royalti minyak enggau gis ngagai Sarawak, ke penguntung sereta pemansang pemisi minyak enggau gis dalam kandang tasik Sarawak,” ku iya madah ba aum pengarang berita ditu, kemari.
Iya madah PH enda mungkir janji lebuh mantaika pekara tu dalam manifesto pengawa bepilih tu tadi ‘ deka nambah royalti petroleum ke Sarawak enggau Sabah ngagai 20 peratus tauka sebela’, See madah PH diatu udah ngambi singkang keterubah ngamatka janji nya, lalu ba iya empu ku iya, berasa lantang ati meda pemujur singkang nya.
Ketegal nya ku iya, iya beterima kasih ngagai iring embing Menteri Besai Tun Dr Mahathir Mohamad sereta Menteri pekara bekait enggau Ekonomi, Datuk Seri Mohamed Azmin Ali ke diberi tanggungjawab ngamatka semaya nya.
“Taja pan amat 20 peratus nya ari penuntung beresi, nambah ngagai lima peratus royalti, agi kurang nyembela ‘ 20 peratis tauka sebela”, tang nadai seiku orang ke ngenggaika pekara nya, iya nya perintah PH ba jalai ke betul ngamatka semaya sida iya ke Sarawak.
“Ketegal nya, aku berasai temegah ati ke Perintah Besai PH. Dibanding enggau 55 taun tu ke udah dipegai ulih Barisan Nasional (BN) sereta 43 taun tegim ke dipegai ulih Akta Pembangunan Petroleum (PDA 1974) alai Petronas bejalaika pengawa sida iya enggau penuh kuasa ba atas minyak enggau gis, tang agi meh ganti rugi ke hak petroleum nya agi mengkang 5 peratus maya nya.”
See madah: “Lebuh BN enggau pemesai parti kediatu, Gabungan Parti Sarawak ( GPS) nyalahka pemesai PH, kitai meseti nemu iya nya sida iya bisi empat iti tunjuk jari nunjuk ngagai sida pulai baru.
“Dalam kandang 43 taun nya, sida iya mendingka jaku, ngemanahka diri enggau Perintah Besai ( maya nya)BN ke betuaika Umno, sida iya nadai ngaga pengawa sida iya ngentanka pemerat minta kunsi sereta bagi ba pemisi petroleum Sarawak.
“Ba sida iya, semina muai peluang dalam kandang empat abad nya, lalu semina mantah Perintah Besai PH, lebuh PH deka meri mayuh agi ke Sarawak enggau rayat Sarawak, sida pemesai BN enggau GPS diatu udah takut, tauka ngemanahka diri minta kasih.”
See madah iya pechaya perintah PH government deka magi penguntung petroleum ke bela ngagai Sarawak, ke pemerat pemansang ke Sarawak.
“Enggau semaya 20 peratus royalti tauka sebela, aku pechaya bisi chara sereta ubah instistusyen kena beratika mayuh agi projek Petronas di Sarawak deka diberi ngagai kompeni asal ari menua tu empu, ari ngemendarka sekeda kompeni ke bisi kaul politik ngambi semua pengawa nya.”
Nya alai ku iya, semaya PH ngagai rayat deka dikeamatka nitihka semaya maya pengawa bepolih besai tu tadi.