Perintah S’wak enggau perintah besai ngembuan kaul ke manah
KUCHING: Perintah nengeri bisi kaul kereja ti manah enggau perintah nengeri kelebih agi bekaul enggau polisi ti senipak enggau Sarawak.
Kepala Menteri Datuk Patinggi Abang Johari Tun Openg madah, taja pia ukai reti dalam politik gempung parti nengeri tu ke numbuhka Gabungan Parti Sarawak (GPS) nyereta Pakatan Harapan (PH).
Iya madahka perintah nengeri patut nempa kaul kerejasama ti manah enggau perintah besai ngambika nengeri enggau rayat ulih maju jemah ila.
“Maya aku ke betemu enggau YB Menteri Besai, kami berandauka pasal kaul entara perintah besai enggau nengeri.
“Lalu aku madah ke iya, kitai deka nyukung polisi perintah besai ti bisi meri empas ngagai nengeri Sarawak, polisi ti manah.
“Tang ari sukut politik, aku madahka ke iya kitai enda nyereta PH lalu nyentuk ke diatu kaul kededua perintah manah amat ,” ku iya.
Abang Johari mansutka pekara nya dalam atur program ngirup lemai CM Abang Jo Begulai enggau Media ‘The Way Forward’ ke diatur ba sebuah hotel ditu, ensanus.
Bejaku baru iya madahka kededua piak nyambut manah kerejasama dua perintah taja pan tu keterubah iya dalam sejarah Sarawak bisi perintah ti enda sama iya nya Pakatan Harapan parti bukai, lalu Sarawak diperintah parti bukai.
Nambahka nya, lebuh ke ngenang penemuai sekeda menteri perintah besai ke Sarawak sereta bepelasarka pekara ti dikerandau kelebih agi bekaul enggau projek, sida iya deka nyambut penemu, ku iya.
“Tang kitai anang enda ingat tu transaksyen entara perintah lama enggau perintah baru, lalu ngambika nadai bechiping ngagai ketuai perintah besai sida iya pan meda baru nama polisi sebedau tu, beri sida iya timpuh, nya kebuah bisi projek tejanggal, engka sida meda baru projek nya,” ku iya seraya madahka ba iya nya timpuh transaksyen.
Ku Abang Johari, maya penatai Menteri Besai Tun Dr Mahathir Mohamad ke Kuching apin lama, maya ke diberi licha bekaul enggau nengeri tu, iya (Menteri Besai) madahka diri puas ati enggau pemansang ditu.
“Ke bendar iya (Menteri Besai) madah ngagai aku iya gagit amat tauka tekenyit meda sepemanjai jalai ke Santubong meda udah bisi begunan, laban suba nadai,” ku iya.
Kelimpah ari nya lebuh ke ngenang pasal penumbuh gempung parti baru, ku Abang Johari, kitai udah nemu model baru dikena ngemansangka Sarawak.
Parti Sarawak iya nya PBB, PRS, PDP enggau SUPP pansut ari Barisan Nasional lalu numbuhka gempung ke dikumbai Gabungan Parti Sarawak (GPS) iya nya parti bepalan di Sarawak aja.
“Model baru iya nya orang Sarawak aja ti ulih ngemansangka Nengeri Sarawak, lalu udah tentu kitai beratka pekara ke disebut Tok Nan iya nya ngambi pulai baru hak kitai.
“Tu chara kitai, kitai enda ulih bepanggai ba orang bukai, awakka kitai empu ngaduka nengeri kitai empu laban semina kitai ti nemu nama ti dikedeka nengeri Sarawak.
“Nya alai kitai pansut lalu numbuhka gempung kitai empu entara parti ba nengeri tu, empat komponen parti, nengah serakup tu kitai neruska pengawa ti dipejalaika niang Tok Nan,” ku iya.
Sama bisi datai ba program nya ensanus, dua Sapit Kepala Menteri Datuk Amar Douglas Uggah Embas enggau Tan Sri Datuk Amar James Jemut Masing, Menteri Muda ba Opis Kepala Menteri (Pekara Korporat) Abdullah Saidol, Menteri Muda ba Opis Kepala Menteri (Undang-undang, Kaul Perintah Nengeri-Besai enggau Pematau Projek) Sharifah Hasidah Sayeed Aman Ghazali sereta Sekretari Perintah Nengeri Tan Sri Datuk Amar Mohamad Morshidi Abdul Ghani.