Sekalika ba renggat kandang menua tauka nengeri patut bejalaika tanggungpengawa ngetanka sukung ngagai perintah
KUCHING: Semua ketuai raban bansa dipinta sepenemu enggau bala ketuai perintah ke bisi diatu sekalika ba renggat kandang menua tauka renggat nengeri.
Menteri Muda Elekterik Menua Pesisir, Dr Abdul Rahman Junaidi madah nya kebuah bala ketuai raban bansa patut begulai enggau pengari rayat bejalaika tanggungpengawa dikena ngetanka sukung ngagai perintah.
“Siti ari nya iya nya ngaul diri rat enggau komuniti di genturung pendiau nentuka pekara pengelantang enggau pemansang genturung seruran dijaga,” ku iya.
Iya mansutka jaku nya lebuh bejaku ba atur pengawa Randau Yang Berbahagia Dr Haji Abdul Rahman Junaidi begulai enggau Ketuai Raban Bansa ungkup sitak Bepilih Kunsil Nengeri (DUN) N.4 Pantai Damai di Kuching, apin lama ke udah.
Dr Abdul Rahman madah berebak enggau nya, tetiap ketuai raban bansa patut ngayanka ulah siru enggau beratka penanggul ti ditapi peranak genturung pendiau nadai ngira bansa enggau pengarap sereta penemu politik.
“Ari pengawa baka tu, aku andal kitai ulih mantu perintah ukai semina ari sukut pemansang modal mensia aja tang pemansang genturung pendiau sereta mega ngemansangka nengeri tu ngagai tikas ti ngemegahka ati agi,” ku iya.
Berebak enggau nya, iya minta semua komuniti di nengeri tu seruran meri sukung ngagai Kepala Menteri, Datuk Patinggi Abang Johari Tun Openg ngatur pengawa enggau nempa nengeri tu maju enggau rayat bepenatai pemisi tinggi dudi hari.
Dulu ari nya, sepenyampau 45 iku ketuai raban bansa sitak DUN Pantai Damai udah ngulu program randau nya.
Program randau nya nyadi pengawa bekunsika buah penemu nuju pengawa nambahka kualiti servis ketuai raban bansa ngagai bala komuniti sereta ngelangkar strategi kemaya hari dikena ngenegapka agi pemansang genturung pendiau sida empu.
Siti ari nya iya nya ngaul diri rat enggau komuniti di genturung pendiau nentuka pekara pengelantang enggau pemansang genturung seruran dijaga. Dr Abdul Rahman Junaidi Menteri Muda Elekterik Menua Pesisir