Bujang berani ti ngetanka menua seruran deka dikeingat belama
KAPIT: Bala bujang berani enda kala enda dikeingat laban ninting taun ba hari tu ( ensanus), menua ngatur aktiviti ngenang pengawa bujang berani ke udah nyaga pengelikun menua. Sida tu nyadi bujang berani laban sida nyendiaka pelasar ke Malaysia moden, pia ku Kaban Kunsil Nengeri (ADUN) Bukit Goram, Jefferson Jamit Unyat.
“Sida ti ngena uniform, raban soldadu enggau polis lebuh ke regas gawa udah berambunka nyawa negi integriti enggau pemaik nengeri. Sida tu ngulihka menua merdeka. Sehari tu, bujang berani tu diau diri laban sida udah meda Sarawak ari baruh pegai kolonial, pengeruga menua ari Indonesia, penyelawai ari Brunei, penyelawai komunis ngachau, enggau ke bukai.
“Ba penerang ke diberi, sida berambunka nyawa nyaga menua Malaysia ke sebedau tu ngambika lantang sereta likun,” ku Jamit kena pagi Hari Dua lebuh iya bejadika aktiviti Hari Bujang Berani di Pendam Methodist, Jalai Selirik ditu.
Ke amat, sida tu mih ti ngelengkaka Malaysia ari dipegai orang bukai negika pengelikun enggau penegap Sarawak lalu udah nya Malaysia.
“Rebak baru patut nemu sejarah pun penusah enggau pengawa besai dipejalaika raban soldadu ngetanka menua bansa. Pia mega, pengawa bala veteran politik kitai baka niang Apai Tun Datuk Patinggi Jugah Barieng ti ada dalam taun 1903 lalu midang kena 8 Julai 1981.
“Pia mega semua bala penghulu Iban ti baum di Kubu Sylvia Kapit berandauka pengawa numbuhka Malaysia dalam taun 1962 enggau Resolusyen Sarawak ke dibantai ti udah nya diambi ke dalam perati lebuh Malaysia ditumbuh,” ku Jamit.
“Pengudah merintah diri, Sarawak udah mayuh mansang, pemansang penyikap perengkaguna enggau infrastruktur baka ngaga jalai alun, bekal kuasa karan enggau ai beresi, sekula digaga enggau palan pelajar tinggi ditumbuh.
“Pekara ekonomi rama ba pejalai ti betul ari pemansang. Ari ekonomi pelasarka pengawa betanam betupi enggau kereja kayu ramu ngagai revolusyen industri ke diatu, ari industri lempung mansang ngagai industri berat,” ku iya.
Jamit ngarapka semua peranak Sarawak ti bisi tanggungpengawa nyaga ulah bebasa enggau penyerakup ti udah lama dikemeran entara bansa ti bebida. Iya ngingatka bisi lebih ari 39 etnik, nya kebuah beguna amat kitai ngemeranka ulah bebatak asur enggau bebasaka pangan diri.
Mejar Kassim Dandi ti ngarika Infantri Briged Ke-9, Pemesai Warren Philip Dullah ari 510 Territorial Army KD Sri Rajang, Chairman Gerempung Veteran Soldadu Malaysia Pampang Kapit, Marin Bilun, Temenggong Wilfred Billy Panyau sereta urung 30 iku raban soldadu bisi datai ngulu pengawa nya.
Aktiviti diatur ba pendam niang Tun Datuk Patinggi Jugah Barieng.