SRDC chakah meri servis ti manah ngagai mensia mayuh nitihka juluk ati perintah nengeri
SIBU: Opis Menua Pesisir Sibu (SRDC) chakah meri servis ti manah ngagai mensia mayuh seriris enggau juluk ati perintah nengeri.
Sekretari SRDC Justani Joni madah, pengeransing ngangkatka sistem servis ukai pekara ke baru tang semampai dikemeratka piak sida.
Iya madah, ubah maya hari tu nejuka pengereja pengawa SRDC enda ulih ngelarika diri megai tanggungpengawa enggau landik ngambika ulih ngenatiak servis ke manah ngagai mensia mayuh.
“Sistem servis ke manah ulih ngelantangka mensia mayuh begulai enggau piak SRDC.
“Dikena bejadika pekara tu, SRDC enda ulih semina ngemeranka pengawa nyaga tauka neritka undang-undang aja tang meseti bejalaika pengawa enggau manah,” pia ku iya madah.
Iya mantaika jaku tu maya Majlis Ramah Tamah Hari Raya begulai enggau komuniti Sibu ditu, kilah ensana.
Sama bela datai maya tu iya nya Chairman enggau Sapit Chairman SRDC Sempurai Petrus Ngelai enggau Robert Lau Hoi Hew sereta Sapit Residen Sibu Wong Hee Sieng.
Justani madah, macham bengkah pelin enggau inisiatif udah mujur diatur SRDC seririh enggau rambai jaku perintah nengeri ‘To Deliver Excellent Service Through High Performence Team Work’.
Ku iya, tu nyengkaum kimpin ‘No Plastic Bag Day’ ke diatur ninting hari Satu di Sibu Jaya dikena ngembing mensia mayuh bela ngintu pemeresi rampa menua.
Kelimpah ari nya, iya madahka SRDC bela ngatur program beripai ti bela ngembuan tuju ngerekaika ulah sayau sereta ngetanka pemeresi enggau pemanah ka rampa menua ba mensia mayuh.
“SRDC diatu benung berunding deka ngatur beberapa bengkah program ke bukai baka ‘Kempen Bayar Cukai Pintu Tertungak Secara Ansuran Tanpa Denda’ enggau ‘Pesta Ambang Merdeka’ ti diperambu diatur berengkah 21 Ogos nyentuk 2 September ti deka datai,” ku iya madah baru.
Bekaul enggau pengerami ke diatur sehari nya, Justani ngarapka pengerami nya ulih nyintalka agi kaul enggau pangan diri antara ejensi perintah enggau gerempung ukai dikuasa perintah (NGO).
“Ari tu kitai ulih nerenakka pengerindu begulai enggau pangan diri kelimpah ransing deka bekerejasama bejalaika tanggungpengawa ti ma pemaik ngagai mensia mayuh,” pia ku iya madah.