Sekeda kandang endur ke baruh di Miri ampuh bah

MIRI: Beratus buah mutosikal ti nengah jalai lama Miri- Bekenu diasuh nikal pulai lalu nengah jalai tebing tasik ngagai Bekenu enggau Miri pengudah jalai ke semak agi Taman Negara Lambir ampuh bah pagi kemari.

Ujan bangat kenyau ari malam Hari Dua (ari pukul 10 malam) nyentuk urung pukul 10 pagi kemari ngujungka kandang menua baruh di mengeri dituntung bah tunggal.

Antara kandang menua kena ampuh bah iya nya kem Program Latih Servis Menua ( PLKN) di Sungai Rait, sekeda genturung pendiau di Bakam (Kampung Tukau, Kampung Raan, Kampung Bakam enggau SMK Agama Miri), Taman Tunku (genturung pendiau di Jalai Daro, Jalai Durin, Jalai Sibu, SK Temenggong Datuk Muip), Pujut Padang Kerbau enggau semak Bakong (Kampung Lepong Ajai enggau Liam).

Ketuai Opis Bomba enggau Penyah Penusah Zon 6, Supt Law Poh Kiong madahka raban iya kiruh kenyau ari tumu pagi nyaut kangau penusah ngenyit ari sida ti betengahka jalai ti tepekul ba ai bah nya sereta mega mantu peranak mindahka keresa sida ngagai tanah ke tinggi agi.

“Bisi tim dianjung ngagai mayuh bengkah endur ti kena tuntung bah tunggal bejalaika pengawa matau gaya bah,” ku iya.

“Ba Genturung Pendiau Bakam, raban tim udah mindahka tiga iku peranak ngagai endur tinggi laban rumah sida ampuh bah,” ku Law.

Ku Law nambah, Genturung Pendiau Bakam pemadu balat kena ampuh bah ke sekali tu laban bah tunggal ngampuhka beberapa rumah ke alai semua nya bisi 10 buah lalu ngerusak kerita.

Tebal agi sida ti tasah ampuh bah udah mindah ngagai rumah kaban belayan diri ti enda kena ampuh.

Naka pukul 10 pagi kemari, ai bah ba sekeda endur udah surut nyengkaum di Taman Tunku.

Tikas ai di Lambir mega diripot udah surut urung pukul 12 tengahari.

Ujan ngetu amat urung pukul 12 tengahari.

Ujan bangat enda ngetu kenyau ari malam Hari Dua iya nya ujan bangat keterubah dirikot pengudah sebulan musim kemarau.