Dr Sim mujur nyuaka geran ngagai 44 NGO di Opis SUPP
KUCHING: Menteri Kaunsil Kandang Menua enggau Pengawa Berumah, Datuk Dr Sim Kui Hian kemari nyuaka geran ngagai 44 gerempung ukai dikuasa perintah (NGO) di Indu Opis Parti Bersatu Rakyat Sarawak ( SUPP) ditu.
Geran diberi nengah Projek Pemansang Menua Pesisir (RTP) enggau Projek Mit Menua Pesisir (MRP).
“Tengahari tu kitai nyuaka dua bansa geran iya nya RTP enggau MRP. Geran dikena mantu gerempung bejalaika aktiviti,” ku iya.
Ngenang kaul ke sama, Sim madah tetiap pengari rayat (YB) diberi agih belanja penyampau RM5 juta nengah RTP ninting taun.
Ku iya, geran RTP nya dikena ngemujur projek ba ‘ kawasan’ baka ke projek mit melankin jalai enggau parit sereta sekeda projek ke bukai.
Presiden SUPP nya madah Sarawak bisi lebih ari 5,000 gerempung ke alai semua nya sigi bisi minta bantu belanja ari perintah.
“Ba taun ke udah, urung 3,000 gerempung nerima bantu tauka geran ari aku.
“Geran RM2 juta datai ari agih belanja nyadi pengari rayat lalu RM2 juta agi datai ari pangku pengawa menteri,” ku iya seraya ma- dah geran senator nadai agi pengudah iya badu mangku pengawa nya.
Sim ke mega Kaban Kunsil Nengeri (ADUN) Batu Kawa madah Perintah Sarawak deka seruran minta agih belanja ungkup pekara pemansang ari Perintah Besai.
“Kitai meseti minta duit ari Perintah Besai, tu ketegal tetiap taun kitai meri mayuh duit ngagai Perintah Besai.
“Enti kitai edna minta, duit nya deka diberi ngagai nengeri bukai,” ku iya.
Iya nambah, Perintah Besai ba taun ke udah bisi meri RM250 juta ungkup projek bekal ai enggau RM400 juta ungkup projek bekal lektrik di Sarawak.