Kabinet Sarawak deka matau bidang baru ungkup ekonomi Tu setipak enggau nengeri tu ke ngembuan pengaya ba pengeraja asal
KUCHING: Kabinet Sarawak deka matau bidang baru ngena teknologi baru, dikena ngenegapka ekonomi nengeri enggau nyungkak pengidup rayat.
Kepala Menteri, Datuk Patinggi Abang Johari Tun Openg madahka, nya setipak enggau pemisi nengeri tu ke ngembuan pengaya ba pengeraja asal.
“Aku empu enggau kaban kabinet, seagi aku nyadi kepala menteri kitai, aku deka matau bidang baru laban pekara nyata kitai ngembuan pengeraja asal.
“Udah nya kitai ulih meri rega ngagai pengeraja asal lalu nya tentu ulih ngenegapka ekonomi kitai sereta ulih ngangkatka standard pengidup kitai,” ku iya.
Abang Johari mansutka pekara nya lebuh iya ti bejaku seraya bejadika pengerami nyuaka Perais Nembiak Nyulut Yayasan Sarawak (YS) 2018 ke diatur ba Dewan Serbaguna Swinburne University of Technology Sarawak Campus ditu, kemari.
Berebak enggau tu, iya ti nyadi Chairman YS meri puji ngagai YS ti udah mayuh nempa raban orang ti bepenemu di Sarawak lalu perintah nengeri mega deka terus nyaup lebih agi mantu nembiak ke datai ari ruang bilik ti kurang penatai pemisi ke nampung pelajar.
Iya madahka nembiak ke nyambung pelajar ngagai renggat tinggi tauka ijazah ba universiti Sarawak empu baka Swinburne, Curtin Universiti di Miri sereta University College of Technology Sarawak di Sibu ulih minta biasiswa, sekularship ke bisi disedia.
Taun tu ku iya YS bisi meri perais ngagai 1,432 iku nembiak serata Sarawak kelimpah ari ti meri biasiswa, sekularship perintah enggau jali ngagai sida ti nyambung pelajar renggat ijazah ba universiti di Sarawak.
“Yayasan Sarawak deka meri sukung ngagai nembaik kitai ke ulih nyambung pelajar sereta ngambi bidang baru lebih agi bekaul enggau teknologi baru. Baka diatu kitai benung bejalaika pengawa pemansik ngasilka hidrogen ke dikelala kitai ngena ekonomi hidrogen.
“Ngena teknologi baru tu, kitai bejalaika pengawa pemansik enggau Sarawak Energy lalu tu teknologi baru ke nembiak kitai ke deka nampung pelajar dalam jeman teknologi, revolusi industri 4.0.
“Semua baru lalu nembiak kitai untung laban ba nengeri tu kitai bisi kereban lalu asas tu iya nya fizik, kimia sereta enti nuan nyambung master udah nya nuan ulih nyadi saintis ti ulih meri rega ngagai pengeraja asal Sarawak,” ku iya seraya madahka nya endang juluk perintah nengeri.
Ba pengerami tu Abang Johari diberi basa bejadika Yayasan Sarawak Student App sereta nyuaka Hadiah Cabutan Tempatan Sijil Simpanan Premium Bank Simpan Nasional.
Sama bisi datai ba pengerami nya kemari, Menteri Kaunsil Kandang Menua enggau Pengawa Berumah Datuk Dr Sim Kui Hian, Direktor Yayasan Sarawak Azmi Bujang; Sapit Sekretari Perintah Nengeri Datu Mohamad Abu Bakar Mardzuki enggau ke bukai kelimpah ari bala nembiak, pengajar enggau apai indai.
Aku empu enggau kaban kabinet, seagi aku nyadi kepala menteri kitai, aku deka matau bidang baru laban pekara nyata kitai ngembuan pengeraja asal. Datuk Patinggi Abang Johari Tun Openg Kepala Menteri Sarawak