Bah tunggal ke suah nyadi di Miri patut diputar lengkas
MIRI: Piak bekuasa menua (PBT) dipinta anang laun mutarka penusah bah tunggal ti suah nyadi ba tiga genturung pendiau di Miri.
Penusah tu lebih agi nyadi ba Taman Tunku, Lepong Ajai enggau Kampung Pujut Padang Kerbau.
Chairman Dayak ThinkTank Group (DTTG) Miri Elias Lipi Mat madah, baka empai lama tu tadi, ujan bangat berengkah 11 malam nyentuk 6 pagi nejuka genturung pendiau di Taman Tunku ampuh bah ngenyit.
Iya madah, mayuh jalai dia ampuh ai urung semeter penalam lalu semina ulih ditengah kerita besai.
“Piak PBT patut beratika pekara tu lebih agi ba sistem entali ai.
“Sebedau tu, ungkus sepenyampau RM1.5 juta udah digerah dikena ngemanahka sistem entali ai ba Taman Tunku.
“Tang nyentuk ke diatu, penusah tu mengkang agi nyadi,” pia ku iya madah ngagai pengarang berita, kemari.
Ku iya, penusah nya balat bendar nanggul peranak genturung pendiau dia.
“Sida ditu semampai nangi maya ujan bangat seagi parit enda diadu ketegal ti betebat enggau uras.
“Piak bekaul anang laun mutarka penanggul tu. Ukai semina nangika bah ngenyit tang penusah bukai nyengkaum igi penyakit tau berampit,” ku iya madah baru.
Kelimpah ari nya, Elias mega ngarapka orang ke diau dia bela nyaga pemeresi ngambika parit enda betebat ketegal uras.
Iya madah, semua piak patut bekerejasama baka nyaga pemeresi kandang pendiau sebedau piak bekaul datai ngemanahka agi sistem entali ai.
Siku ari orang ke diau ba Taman Tunku, Paul Randy Unchu madah, penusah ampuh bah ngenyit nya nyadi kenyau ari taun 2017 tang nyentuk ke diatu empai diputarka.
“Ngarapka piak bekaul datai kitu ngambika penusah baka tu badu agi nyadi.
“Kami semampai nangi belama maya bisi ujan enda ngira malam tauka siang,” ku iya madah.
Maya ampuh iya madah, kelimpah betatika barang di rumah sida dia mega nadai chara bukai enti enda mindahka kerita ngagai palan ke tinggi agi.
“Batang kebuah penusah tu nyadi iya nya ketegal parit ti betebat laban tanah.
“Udah tu kami andal amat parit ditu dikemanahka agi sebedau ampuh bah baru,” pia ku iya. KUCHING: Kaban Parlimen (MP) Julau Larry Sng dichiri nyadi Chairman Kaunsil Lada Malaysia ( LLM) ke baru nganti ex-MP Saratok Tan Sri William Mawan Ikom.
LLM nengah website ejensi ke pemadu baru (2 Ogos), ngerintai nama Larry ba penuduk pemadu atas nyadi chairman.
Direktor Besai LLM Dr Harry Entebang lebuh dikerandau madah penerang rasmi sentang pekara nya deka dikeluar enda lama agi.
Larry Sng, 35, nyereta Parti Keadilan Rakyat (PKR) pengudah menang ba sitak parlimen Julau nengah tikit chalun ngati kediri ba Pengawa Bepilih Besai Ke-14 (PRU14) kena 9 Mei tu tadi.
Iya ngalahka chalun Barisan Nasional(BN) ari Parti Rakyat Sarawak (PRS), Datuk Joseph Salang Gandum nengah majoriti undi 1,931.
Larry Sng kala mangku pengawa nyadi Kaban Kunsil Nenegri(ADUN) Pelagus ari 2001 nyentuk ngagai 2011.
Maya nya iya mangku pengawa menteri muda lalu ngemata tiga portfolio iya nya ba pemansang industri, perambu ekonomi ba opis kepala menteri enggau latih nembiak ari 2004 nyentuk ngagai 2011.
Iya ditingkilka ari parti PRS ba taun 2007 ketegal sekeda penyarut. Tajapan enda ngarika sebarang parti, Sng dichiri nyadi penyanding penemu bagi nembiak di Opis Kepala Menteri.
Iya mangku pengawa nyadi presiden ‘Sarawak Workers Party’ (SWP) ba taun 2013 sereta kala bediri di sitak parlimen Lubok Antu ba taun nya.
Taun tu, iya bediri di sitak parlimen Julau iya nya seiti sitak ke enda dikerebut pengari ari Pakatan Harapan ngambika iya (Sng) betengali alan ngelaban Salang.
Sereta enggau MP Lubok Antu Jugah Muyang ke mega menang nengah tikit bebas, seduai nyemilik PH nengah chara nyereta PKR pengudah PRU14.
Kelimpah nama Larry, MP Bandar Kuching Dr Kelvin Yii enggau Chairman DAP pampang Katibas Paren Nyawi bisi dirintai nyadi kaban komiti LLM.
Sapit Sekretari Perintah Nengeri Datu Jaul Samion enggau pemesai ba Opis Menteri Betanam Betupi Moden, Tanah Adat enggau Pemansang Kandang Menua, Churchill Lawi bela dalam lembaga LLM ke ditumbuh ba taun 2007 nukar Kaunsil Makit Lada.