10 ketuai raban bansa di Sri Aman nerima setipikit

SRI AMAN: Urung 10 iku ketuai raban bansa ba Sri Aman nerima setipikit nyadi ketuai raban bansa tui disuaka Menteri Muda Pengelantang Komuniti Datuk Francis Harden Hollis ba sebengkah pengawa diatur ba Bilik Aum Opis Residen Bagi Menua Sri Aman ditu pagi kemari.

Semilan ari ketuai raban bansa nya datai ari sitak Kunsil Nengeri (DUN) Simanggang, lalu siku agi ari DUN Bukit Begunan.

Semilan ketuai raban bansa tu iya nya Tuai Rumah Andrew Sah Ilok ari Nanga San, Tuai Rumah Buyung Malai ari Lepong Simpai, Tuai Rumah Jimmy Langi ari Bayai, Tuai Rumah Lang Sadai ari Kampung Sungai Putong Undop, Tuai Rumah Maria Lutang ari Sengelau, Tuai Rumah Silver Garit ari Kenyungan Undop enggau Victoria Marudie ari Rampu Wie Undop.

Dua ketuai raban bansa China ari DUN Simanggang ke bela nerima setipikit tu iya nya Kapitan Ling Siew Hung ari Munggu Sabun enggau Kapitan Wilson Chai Siew Lin ari Brayun Ulu.

Udah nya, ketuai raban bansa ari DUN Bukit Begunan ke nerima setipikit iya nya Penghulu Lee Thong Sen.

Harden ke mega Kaban Kunsil Nengeri (ADUN) Simanggang maya ngenataika jaku lalau rambau pengawa nya ngarapka sida ke udah dichiri nyadi ketuai raban bansa bejalaika tanggungpengawa enggau manah.

Kenu ku iya, sida nyadi jematan penyambung entara rayat enggay pengari rayat sereta ngagai ejensi perintah di bagi menua tu.

“Aku ngarap, udah nerima setipikit tu, semua kitai bebendar agi gawa mantu pengari rayat sereta ejensi perintah ke bukai betemu enggay rayat, tanyaka penanggul ditapi sida lalu berundingka jalai mutar kelimpah kenataika penanggul ngagai pengari rayat diri empu,” ku iya.

Nya alai, iya ngarap rayat ba renggat baruh patut meri kerejasama ngagai bala ketuai raban bansa ngambi ngemuntang pengawa sida mantu rayat ke dipegai.

Sama bisi datai Residen Sri Aman Indit Bangai, Temenggung Samuel Lawen, Temenggung Kuek Aik Seng, Pemancha Micheal John Sanggop, Pemancha Lee Siang Hua, Penghulu Tiong Chong Onn enggau sida bukai.