Lumba perau kayak entara aktiviti diatur nyerumba Festival Tagang

KUCHING: Lumba perau kayak entara sekeda aktiviti ke dirintai ba Festival Tagang Antarabangsa Semadang ke4 ke deka diatur berengkah 31 Ogos nyentuk ngagai 2 September tu.

Koordinator lumba, Wilson Mapus madah lumba ba penyauh urung 4 km nya dibuka ngagai peranak Malaysia enggau peranak menua luar lalu deka diadu kena 2 Sept.

Ku iya, lumba perau kayak nya berengkah jam 11 pagi lalu diatur ba sepemanjai Sungai Semadang, Jalai Puncak Borneo iya nya urung 40 km ari Mengeri Kuching.

Wilson netapka tetiap tim diarika dua iku pengayuh lalu tau kededua lelaki, kededua orang indu tauka champur orang indu enggau lelaki.

Bayar masuk nyereta lumba ditetap RM30 lalu penyereta meseti mai perau kayak kediri empu tauka nyuwa ari pemekal perau kayak ba palan lumba nengah rega RM50 seiti perau.

“Kayak ke dulu datai ba garis adan deka bulih lumur satu. Enti bisi karam, sida tau ngangkatka diri lalu nampung lumba.

“Pemutus ari ‘ marshall’ enda ulih dibantah lalu sebarang bantah enda deka dinah ketegal tu semina lumba ngerinduka ati, beperindang aja maya belumba,” ku Wilson.

Ketegal lumba berengkah jam 11 pagi, iya ngelalau penyereta datai ba palan endur lumba berengkah jam 10.30 pagi.

Penyereta mega diperansang mai jaket pengelikun ke diri empu lalu dikena maya belumba.

Perais lumur satu RM300 besereta tropi, lumur dua enggau lumur tiga deka nerima RM200 enggau RM100 besereta tropi.

Penerang ke silik sentang lumba tau tau dikenatai ngagai Wilson Mapus (0198781182) enggau Beko Sijip (019-8258141).