Bisi 320 iku pesereta nyukung program ‘Run Transformer Run’ SK Lepong Baleh

KAPIT: Kaban Kunsil Nengeri (ADUN) Pelagus, Wilson Nyabong Ijang muji insiatif dipejalaika Sekula Primari (SK) Lepong Baleh ngatur Pelanda Ngiga Belanja ungkup aktiviti ko-kurikulum sekula nya.

“Inisiatif SK Lepong Baleh ngatur pelanda ngiga belanja ungkup aktiviti ko-kurikulum sekula chukup dipuji. ‘Run Transformer Run’ tu aktiviti ti ngerinduka ati dikena ngiga belanja lalu aku temegah meda pemujur iya,” ku Nyabong.

Nyabong mega meri terima kasih ngagai semua pesereta ti ngelimpangka awak diri ngulu ‘Run Transformer Run’ tu.

“Bisi 320 iku pesereta dibagi ngagai empat kategori, Kategori Lelaki enggau Indu Tebuka, Nembiak Mit Lelaki Tebuka enggau Nembiak Mit Indu Tebuka.

“Nengah aktiviti ti ngaul nembiak sekula di pelilih Kapit sereta sida ke besai tuai. Tu mega dikena meransang aktiviti bepengerai ngambika batang tubuh rega seraya begigaka belanja ari mensia mayuh,” ku Nyabong lebuh bejadika Run Transformer Run 2018 diatur SK Lepong Baleh kena pagi Hari Enam di Palan Sivik ditu.

Nyabong mega dipebasa ngelepas enggau nyuaka midul sereta setipikit ngagai bala pemenang. SK Lepong Baleh siti ari 12 buah sekula primari di baruh sitak Pelagus. Bisi 400 lebih iku nembiak enggau urung 50 iku pengajar.

Sama bisi datai Kepala Pengajar, Malang Biat, Pemantu Kanan Luis Malantika Robin, Ban Kayan enggau Lau Ngee Kiong.

Ba Kategori Nembiak Lelaki Tebuka enggau Nembiak Indu Tebuka, nembiak lelaki ari SK Kampong Baru dipadu menggi gelar champion enggau lumur dua, Joseph Like enggau Asli Radit Ali. Seduai tu udah ngarika Sarawak ngagai National Age Group Run, bulih perais sagu ati apin lama ke udah.

Kategori Nembiak Indu Tebuka, Marin Weng enggau Arshyria Juliana bulih gelar champion enggau lumur dua.

Kategori besai tuai, Hunsan Hasing enggau Yong Zinn Fei menggi gelar champion enggau lumur dua.

Kategori sekula primari belanda penyauh 3km seraya sida besai tuai 8km penyauh.

KAMI MENANG: Pemenang ba kategori Nembiak Lelaki enggau Indu sekula primari begambar enggau bala pengajar SK Lepong Baleh.

BARU DATAI: Siku ari pemekit baru ngenatai diri ba adan.

TEGAR BELANDA: Hunsan Hasing temegah ati mantaika midul enggau setipikit gelar champion seraya Yong Zinn Fei (kiba).

NYADIKA KENANG: Bala nembiak ari SK Kampung Baru nyata mantaika penyulut diri belanda ba Kategori Nembiak Lelaki enggau Indu, Pemantu Kanan SK Kampong Baru Julius Ata begambar enggau (ari kiba) Joseph Like (champion) enggau Asli Radit (lumur dua), Marin Weng (champion) enggau Arshyria Juliana (lumur dua).