Opis Menteri Kereja Raya sedia ngereja pengawa nyambung karan sekula: Baru
SIBU: Opis Menteri Kereja Raya andal piak sida ulih ngereja pengawa nyambung karan ngagai sekula ari grid karan besai di Sarawak nyema pengawa nya diberi ngagai sida.
Menteri ba opis menteri tu, Baru Bian madah, taja pan baka nya tu bepanggai ba belanja ti diungkupka.
“Enti pengawa tu diberi ngagai Opis Menteri Kereja Raya, kami besedia bejalaika pengawa tu.
“Kami mega andal pengawa tu deka diberi ngagai kami kelimpah ngelama tu mega endang megai tanggungpengawa ngaduka sekula lama serata Malaysia,” pia ku iya madah maya berandau enggau pengarang berita di Padang Bilun Sibu ditu, tengahari tadi.
Dulu agi ari tu iya dipinta ngelansa penerang Menteri Opis Pelajar Dr Maszlee Malik ti madahka pengawa nyambung sekula ke nadai karan di Sarawak disambung ngagai grid karan besai udah diberi ngagai Opis Kereja Raya (JKR).
Ditanya penampau sekula ke agi bekenaka injin api di Parlimen Selangau, Baru madahka diri empai bisi penerang ke silik.
“Taja pia...endang sigi bisi (sekula empai disambung karan),” ku iya madah baru.
Penatai ti keterubah iya sepengudah dichiri nyadi menteri ngagai Sibu tu disambut Chairman Parti Keadilan Rakyat (PKR) Sibu Abdul Raafidin Majid enggau sekretari PKR Kanowit George Chen sereta beratus iku penyukung ke bukai.
Baru ti mega Kaban Parlimen Selangau enggau Kaban Kunsil Nengeri (ADUN) Ba Kelalan maya tu madahka diri lantang ati meda pemujur pejalai projek Pan Borneo ba nengeri tu naka ke diatu.
Iya madah, pejalai projek nya siti ari berita manah lalu patut diteruska.
“Nitihka ripot diberi ngagai aku kena 25 May tu tadi, pejalai projek nya naka 22 persin tembu.
“Enti nitihka langgur penembu projek, tu dua peratus dulu.
“Aku lantang ati meda pejalai projek tu,” ku iya madah.
Taja pan baka nya, ku Baru, pejalai projek ke sebaka di Sabah diatu enda nitihka langgur projek.
“Pengelubah projek di Sabah laun ari satu nyentuk 36 peratus bepanggai ba renggat siti-siti endur,” pia ku iya nerang.