Diatu perintah Pakatan Harapan bejadika projek nitihka pematut laban bisi betapi enggau penanggul ba belanja

SIBU: Perintah Pakatan Harapan ( PH) bejadika projek pemansang rayat nitihka pematut sereta bagi ke pemadu beguna dikena laban bisi penanggul ba belanja.

Ketegal nya Menteri Kereja Raya Baru Bian ( gambar) minta rayat meretika chara perintah ke diatu ngaduka projek ungkup rayat.

“Baka ke ditemu bala mayuh, PH deka ngaga projek pemansang bepelasarka pematut dulu laban kitai agi bisi penanggul ba belanja.

“Arapka rayat nemu lalu besabar enggau pekara tu,” pia ku iya madah.

Iya mantaika jaku tu maya Pengerami Pemesai Begulai Enggau Rayat ba Rumah Nyawin, Sungai Tamin ditu, lemai kemari.

Kaban Parlimen Selangau ti mega Kaban Kunsil Nengeri ( ADUN) Ba’ Kelalan tu bela madahka di Sarawak lebih kurang 36,000 kilometer pemanjai alun ti ari penyampau nya urung 1,000 kilometer jalai ke digaga perintah besai.

Iya madah, jalai ke digaga perintah besai nya dipegai opis menteri iya lalu kebukai nya baka jalai ngelawa genturung menua dipegai perintah nengeri tauka opis menteri menua pesisir enggau opis menteri ke bukai.

“Taja pan baka nya, kitai deka naka alah meri kerejasama enggau perintah nengeri tauka opis menteri ke bukai ngambika mai pemaik ngagai rayat ditu,” ku iya nerang.

Ba pengerami nya, Baru bela ngemendarka belanja meli pam ai dikena meri bekal ai beresi ngagai SMK Ulu Balingian kelimpah ngungkupka belanja dikena Biro Indu Rumah Nyawin.

Sama bela datai maya tu iya nya Chairman Parti Keadilan Rakyat ( PKR) Sibu Abdul Raafidin Majidi, Penghulu Thomas Jawa sereta bala bukai.

Baka ke ditemu bala mayuh, PH deka ngaga projek pemansang bepelasarka pematut dulu laban kitai agi bisi penanggul ba belanja. Baru Bian Menteri Kereja Raya