Program gerija patut diatur mayuh agi alai begempuru, ngeringka pengarap
KUCHING: Pemungkal Projek Pensel, Norina Umoi Utot bisi dikangau ngulu pengawa berami begulai enggau raban Parish Youth Fellowship ari Gerija St. Luke’s Sri Aman ba atur Pengerami Makai Lemai Ngintu Hari Raban Nembiak Seraya Ngiga Belanja ungkup gerija nya.
Pengerami nya mujur diatur ba sebuah palan makai tebilang di menua nya kena lemai Hari Lima, 3 Ogos tu tadi lalu bisi digulu urung 500 iku pengabang ti datai ari peranak menua nya enggau pelilih bukai.
Norina ngepunka jaku diri enggau bekunsi siti genteran jaku ari bup kudus ti ditibak ari 1 Timothy 4:12 – ‘Anang nejuka orang ngemaruhka nuan ketegal nuan agi biak, tang awakka nuan empu, ari jaku, ulah, pengerindu, pengarap enggau pengidup nuan ti tuchi, nyadi teladan ke orang ti arap.’
“Enti kitai sama bela beratika genteran jaku tu, chukup besai reti enggau pangka kita nembiak kelebih agi kita ti bisi pemerani enggau ati taluk ngereja pengawa ti meri pemansang dalam pengarap sereta pemujur ba pendiau pengidup dudi hari.
“Temegah endar asai meda pengawa kita nembiak rebak baru laban ulih ngatur pengawa ti begigaka belanja mantu gerija kitai baka ke lemai tu lalu patut diteladan nembiak bukai jemah,” ku Norina muji.
Nangkan nya, Norina mega ngarapka udah tu mayuh agi atur program ke sebaka ungkup gerija diatur dikena mai semua orang begempuru, ngeringka pengarap enggau ngangkatka pengidup ti menyana agi.
Ku Norina, iya naka ulih ngena penau enggau pengulih diri mantu sereta meri sukung ngagai semua pengawa gerija kelebih agi ba pekara belanja.
“Nya kebuah lemai tu aku bisi ngagihka pemeri ari kuchik diri empu dikena kita bejalaika aktiviti gerija, ngemai pemaik ngagai semua.”
“Kandang diatu, aku nadai ulih ngagihka penyampau belanja ti besai laban aku mega bisi nyaup raban Gempung Ukai Dikuasa Perintah (NGO) bukai bejalaika pro- gram tauka aktiviti sida.
Ku iya, apin lama ke udah, raban NGO Dayak ari Serakup Dayak Sarawak (PEDAS), Dayak Think-Tank Group (DTTG) enggau Serakup Dayak Iban (SADIA) Krian bisi datai berandauka pengawa sida ngatur Forum Adat Iban 2.0 kena 25 Ogos tu di Dewan Suarah Sri Aman.
Bulan November tu ila iya bisi dikangau ngulu pengerami makai lemai Gerija Sidang Injil Borneo (SIB) lalu tu basa chukup besai ngagai iya ti nyadi ketuai pengabang ba atur pengerami nya ila, ku Norina.
Nambahka nya, Norina ngamatka jaku dipegai iya ke alai penyulut pelajar nyadi kunchi pengidup dudi hari nengah pengawa NGO dikumbai Projek Pensel, ti dipun dalam bulan Jun 2016.
“Projek Pensel tu siti ari chara dikena aku mantu bala nembiak sekula ngemansangka diri ba pelajar ngambika sida teulihka pemujur.
“Nya alai, ba dini-dini endur aku nemuai, besadungka kereban tulis tauka set pensel ngagai bala nembiak endang nyadi batang pengawa aku laban pensel tu kuasa tauka pengaruh kena idup dudi hari.
“Diatu aku udah bisi numbuhka tiga palan tuisyen belajar Jaku English nadai bebayar, siti di Simanggang lalu dua ba Balai Ringin.”
Jaku Norina udah dibacha Sekretari Khas iya, Yen Jebeni ti datai ngarika iya ti enda ulih datai ketegal pengawa ti enda ulih seliah.
Berebak enggau pengerami nya, Norina bisi nyuaka pemeri penyampau RM2000 ngagai raban Parish Youth Fellowship Gerija St Luke’s Sri Aman.
Entara bala bisi datai Bishop Datuk Bolly Lapok, Venerable Archdeacon Chimbie Bunsie, Venerable Archdeacon Jamal Senada (Vicar Gerija St Luke’s), Chairman Parish Youth Fellowship Suzan Wee enggau bala bukai.