Sida tu nyengkaum ngembuan pemujur ba pengawa dagang, industri, pengawa perintah sereta nyadi ketuai politik

KUCHING: Sekula ‘mission’ nempa raban orang ke mujur ba pengawa dagang, industri, pengawa perintah sereta raban ketuai ke diatu, ku Kepala Menteri Datuk Patinggi Abang Johari Tun Openg.

Ketegal nya, Abang Johari madah cherita pemujur ke udah ditempa sereta penuduk Sarawak diatu asil pengawa ke digaga raban ke ditempa ari sekula ‘mission’.

“Aku ke mega siku produk ke ditempa sekula ‘mission’ berasai temegah ketegal disengkaum ba sekula tu tajapan ukai kristian.

“Siku penulis kala madah sekula ‘ mission’ dikelala ketegal tradisyen, pemujur ba pekara pelajar enggau komitmen ti dikemegah ke udah nempa produk ke chukup manah ba ulah sereta runding, disiplin enggau citizenship,” ku iya.

Abang Johari mansutka jaku nya ba Pengerami 170 Taun St Mary ke diatur di seiti hotel ditu, malam ensanus.

Teks jaku Abang Johari dibacha Menteri Pelajar, Sains enggau Pansik Teknologi

Siku penulis kala madah sekula ‘mission’ dikelala ketegal tradisyen, pemujur ba pekara pelajar enggau komitmen ti dikemegah ke udah nempa produk ke chukup manah ba ulah sereta runding, disiplin enggau citizenship. Datuk Patinggi Abang Johari Tun Openg Kepala Menteri Sarawak

Dato Sri Michael Manyin ti datai ngarika iya.

Abang Johari nambah, entara sekeda ketuai ke tebilang ke ditempa sekula ‘mission’ iya nya Tuai Pemegai Menua( TYT) Tun Pehin Sri Abdul Taib Mahmud (St. Joseph), Niang Pehin Sri Adenan Satem, Tan Sri Dato Sri Empiang Jabu (St. Mary).

Sekeda ke bukai, Niang Dato Tra Zender, Datuk Hafsah Harunenggau Dato Tom Abang Saufi.

“Raban tu udah ngangkatka ekonomi enggau pemansang Sarawak dulu suba, diatu enggau jemah ila.

“Aku pechaya sekula ‘mission’ deka terus ninggalka pesaka enggau pemujur ba pengawa pelajar kelimpah nempa raban nembiak ke diguna jemah ila,’ku iya.

Abang Johari nambah Perintah Nengeri deka seruran meri sukung ba pekara pemansang sekula ‘mission’.

Raban nembiak ari mayuh bengkah pupu bansa, adat enggau jalai pengarap belajar di sekula ‘mission’, tandu Abang Johari.

Bela datai Presiden Sekula Mission Anglika The Right Reverend Bishop Danald Jute, Tan Sri Dato Sri Empiang Jabu, Sapit Sekretari Perintah Nengeri Datu Jaul Samion enggau Chairman Pengatur Pengerami Datin Evelyn Ritikos Jaul.

BEJADI: Manyin(empat kiba) begulai enggau (ari dua kiba) Empiang, Evelyn enggau Bishop Danald ngempat kek 170 Taun St Mary di Kuching malam ensanus. Bela dipeda Jaul(kiba).

MESETI NITIH ATUR: Raban KPDNKK dipeda ngerintai penyalah ti dikereja ba bansal bejual barang.