Pemutus peresa enda manah laban mayuh sekula ti repuk

KUCHING: Menteri Pelajar, Sains enggau Pansik Teknologi Dato Sri Michael Manyin netapka pendiau sekula ke udah kelalu mayuh repuk nyadika kebuah Sarawak ngerikod pemutus peresa perintah ke enda manah.

“Ba pemutus peresa SPM taun ke udah, Sarawak ba penuduk lumur 15 ari 16 nengeri iya nya ba penuduk lumur dua ari baruh lalu seruran ngenanka penuduk nya dalam timpuh berapa taun ke udah.

“Ba peresa UPSR, semina ba taun 2017 Sarawak ba penuduk lumur 13 ari 16 nengeri. Ngelama tu kitai ba penuduk lumur 14,” ku iya.

Manyin mansutka jaku nya rambau ngulu pengerami 170 Taun St Mary ke diatur di seiti hotel ditu, malam ensanus.

Iya datai ngarika Kepala Menteri Datuk Patinggi Abang Johari Tun Openg ke alai pengerami bela digulu Presiden Sekula Mission Anglika The Right Reverend Bishop Danald Jute.

Ku Manyin nambah, Sarawak bisi 1,457 iti sekula lalu ari penyampau nya, 1,020 sekula udah balat repuk.

“Ari 1,020 ke ba ketagori repuk, 415 sekula ba kategori pemadu repuk lalu enda ulih dikemanah agi, semina ulih diganti.

“Pendiau sekula ke repuk tu nyadi kebuah Sarawak ngerikut pemutus peresa perintah ke enda manah ngelamatu,’ku Manyin.

Ngenang kaul ke sama, Manyin madah kenyau iya mangku pengawa nyadi menteri pelajar, pansik udah digaga ba sentang pendiau sekula ba ketegori repuk.

Ku iya, Sarawak begunaka belanja RM3 biliun ba pengawa ngemanah enggau nganti sekula dalam kategori tu.

Iya pechaya, enti semua sekula tu udah dikemanah tauka diganti, Sarawak ulih ngerikut pemutus peresa ke manah agi jemah ila.