Apai indai meseti pintar matau ulah anak

KUCHING: Raban apai indai meseti pintar ngaul sereta matau ulah bala anak ngambika enda terunda enggau ulah negatif maya ke diatu.

Kaban Parlimen( MP) Bandar Kuching Dr. Kelvin Yii madah pemansang ba pekara tekonologi diatu meri pemar ngagai apai indai ba atur ngintu bala anak.

Ku iya, nembiak diatu ukai semina tau terunda enggau ulah negatif tang gaya pengidup negatif nya tau ngerembai nengah tunjuk jari aja.

“Dunya nadai adan diatu ngujungka mayuh macham pekara negatif ulih dikerembai nengah internet sereta media rama.

“Beri pengerindu ngagai bala anak sereta pendingka sebana ati sida ngambika sida ngasaika diri dampih enggau kitai.

‘ Enti sida dinah enggau manah, mudah agi bala nem- biak meretika jaku apai indai,”ku iya.

Dr. Kelvin mansutka jaku nya ba Pengerami Hari Apai Indai 2018 di Balai Mensia Mayuh Kampung Malaysia Jaya di Petra Jaya ditu, kemari.

Pengerami diatur Opis Menteri Pemansang Orang Indu, Ruang Bilik enggau Komuniti(LPPKN) nengah kerejasama Kemas Sarawak.

Kelimpah ari nya ku Dr. Kelvin, apai indai mega meseti nyadi ‘role model’ ngagai bala anak.

“Apai indai meseti dulu ngembuan ulah manah ngambi tau nyadika chunto emggau teladan,”ku iya.

Ruang bilik ke lantang deka nempa komuniti ke bepengelantang, tandu iya.

Entara program ke bisi disedia rambau pengerami iya nya servis klinik mindah kin kitu LPPKN ke nyendia servis betuchuk HPV perchuma, ngerijista mamogram, servis mamacare, pengawa mandangka servis LPPKN enggau Kemas, kembara kaunseling enggau ke bukai.

Bela datai Direktor LPPKN Sarawak Chai Cheng Ho.