Bisi empat isu besai dibantai MP Sarikei ba Aum Parlimen
SARIKEI: Bisi empat kesemua tanya ngaul penanggul rayat di Parlimen Sarikei ti udah dibantai rambau Aum Parlimen tu tadi, seraya lima agi isu iya nya bekaul enggau penanggul rama, pia ku Kaban Parlimen (MP) Sarikei, Andrew Wong Ling Biu.
Ku iya semua penanggul ti ngaul renggat Parlimen Sarikei belalauka isu ti dibantai enggau dikenatai bala komuniti ngagai raban ketuai di sitak tu.
“Isu keterubah di Parlimen Sarikei udah disebut ba aum parlimen nya bekaul enggau suntuk paking kerita ungkup mensia mayuh kelimpah gaya pendiau Poliklinik Sarikei ti sekut begunaka atur pengawa lengkas dikena mutarka iya laban penanggul udah kelalu lama ditapi peranak ti datai kia.
“Ba isu kedua, bela ngaul bekal ubat di Sepital Sarikei ti mimit amat/bisi tatak ke alai mayuh bekal ubat enda chukup lalu raban sepital udah natak bekal ubat kelebih agi ubat ti dikena pesakit ungkup timpuh panjai, ambika chunto, bekal ubat suba diberi ngagai pesakit ungkup sebulan tang diatu semina diberi ungkup seminggu aja.
“Pekara balat ngenyinuka ati, bisi bekal ubat diberi semina ungkup tiga hari aja, pekara tu balat nating pesakit ke alai sida berundang ngagai sepital ngambi ubat diri,” ku iya ba penerang berita, kemari.
Lansa isu ketiga ku iya bekaul enggau pengawa ngaga jematan baru besemak enggau Pasar Jakar.
“Belalauka penerang diulih kitai, jematan baru tu digaga bisi baruh mimit lalu entukar enda ulih mansa di baruh iya.
“Berindik ari penanggul tu, sida ti betengahka jalai nengah jalai jauh agi enggau melit (bepusin u) ngelawa Pasar Jakar, kelebih agi peranak ari menua Merudu, Meruton enggau Sare.
“Ari isu tu, kitai udah minta Opis Menteri Kereja Raya beratika baru pekara tu ngambi enda nating rayat sitak tu,” ku Andrew madah nyemetak.
Ba isu nasional enggau dunya, Andrew mega ngemai penanggul bekaul enggau peminta ngagai Opis Menteri Pengerai Malaysia ngambi nganjung siku lutur ti bepau gawa di tetiap Klinik 1Malaysia ti bisi di menua tu.
“Isu rega komoditi produk lada nurun ngenyit lalu pekara tu meri pangka besai amat kelebih agi ngagai pekebun mit enggau mega pedagang lada di nengeri tu.
“Kelimpah ari nya, kitai mega bisi mantaika isu bekaul enggau rega minyak makai niki dijual ba makit.
“Seraya isu bukai bela dibantai ba aum parlimen bekaul enggau penanggul pengawa puang sektor perintah ngelebihka siti bansa ari bansa bukai. Pekara tu ngayanka bisi bechiping ke alai isu raban bansa sudah dipetalat.
“Ba aum tu mega, kitai udah mantaika isu nadai kereja bala graduet pelajar di Sarawak majak nambah. Mayuh graduet kelebih agi ti ukai ari kus pelajar diambi gawa nyadi pengajar interim tang di Sarawak enggau Sabah agi tubah graduet ngembuan kus pelajar,” ku iya.
Ari isu ti udah dibantai tu, Andrew ngarap ulih diperati nitihka pematut ari raban perintah ngambika atur patut dipejalai enggau jampat.