Projek beungkus RM6.8 juta nya ditimpuh dalam kandang 18 bulan tauka patut tembu kena 10 September 2018, ku Safiee

DARO: Kereja ngaga Opis Bomba enggau Penyah Penusah Daro, perengka guna ti dianti peranak menua apin tembu taja urung sebulan agi timpuh ngaga.

Kaban Kunsil Nengeri (ADUN) Daro, Safiee Ahmad madahka projek beungkus RM6.8 juta nya ditimpuh tembu kena 10 September 2018.

“Aku ngarapka raban bekuasa ulih matau projek tu enggau suah agi laban opis bomba pemadu semak iya nya dua jam setengah pejalai,” ku iya madah ngagai The Borneo Post, kemari.

Ku Safiee, peranak diau ngelingi udah kelalu lama nganti opis bomba nya digaga di menua nya.

Iya mega ngansak bala pemesai khas perintah Pakatan Harapan (PH) seruran ngatur pejalai gawa matau pejalai projek Perintah Besai.

“Mensia mayuh sedar Menteri PH udah nyiri mayuh pemesai, nyengkaum sida ti matau Opis Bomba enggau Penyah Penusah Malaysia.

“Aku ngarapka sida ulih bejalaika tanggungpengawa enggau manah lalu enda bekenaka pengawa nyiri sida nya ungkup guna politik,” ku iya.

Safiee belalauka pengawa nyiri bala pemesai khas Opis Menteri Pengawa Berumah enggau Kaunsil Kandang Menua iya nya Ketuai Indu PKR Sarawak Nurhanim Mokhsen enggau Mandal Ketuai Indu PKR Nasional Voon Shiak Ni.

Projek tu nitihka pematut tembu dalam timpuh 18 bulan, ku iya nyemetak madah, seraya mantaika pengandal ngambika enda betangguh kelalu lama.

“Kitai mereti enti sida napi penanggul ti enda disadang, tang aku ngarapka sida ulih nembuka projek tu sebedau ujung taun 2018,” ku iya.

Aku ngarapka raban bekuasa ulih matau projek tu enggau suah agi laban opis bomba pemadu semak iya nya dua jam setengah pejalai. Safiee Ahmad ADUN Daro