Pengawa ngemerat jaku English ukai reti ngiarka BM Tang dikena nentuka raban nembiak peranak Sarawak tau bulih kereja pengudah sida tama ngagai makit kereja
MIRI: Pengawa dipejalaika Perintah Nengeri ngemeratka Jaku English ukai reti deka ngiarka Jaku Melayu ( BM), tang dikena nentuka raban nembiak peranak Sarawak tau bulih kereja pengudah sida tama ba makit kereja.
Nitih ku Menteri Pelajar, Sains enggau Pansik Teknologi, Dato Sri Michael Manyin Jawong, BM dipejalai dikena ngempung peranak Malaysia ti datai ari pupu bansa, kelebih agi di Sarawak ti bisi lebih ari 28 raban etnik.
Taja pia ku iya, penyerakup ke amat ulih dijapai nengah pengelantang raban bansa, lalu ukai BM kediri aja.
“Kitai pechayaka semua tu (penyerakup) endang enda ulih dijapai enti sema kitai nadai ngembuan pengelantang raban bansa baka ke sehari tu, tu ukai ketegal BM. Ukai laban kitai enda ulih nyapai nengah BM, tang ketegal dia kelalu mayuh politik.
“Ba penemu aku endang patut ngaku pekara tu, kelalu mayuh politik, nya kebuah mayuh amat petalat penemu antara raban bansa ti bebida.
“Bisika kitai enda malut semua pekara enggau politik? Bisi maya pengarap kitai mega dibalut politik, pekara pelajar mega dibalut politik, nyauka semua pekara di Malaysia tu dibalut politik.
“Nya kebuah, kelebih agi di Semenanjung, bisi penanggul nyapai pengelantang ba raban bansa. Tang aku ulih madah, Sarawak benasit amat (laban) kitai enda malut pengarap ngena politik, lalu pelajar enggau kitai deka seruran baka tu,” ku iya.
Iya mansutka jaku tu lebuh bejadika dua hari berunggu STEM Playground 2018 – Miri Curtin IEEE Science and Technology Exhibition and Kids Festival di Pustaka Miri ti berengkah ensana.
Program tu diatur Perintah Nengeri enggau Tabung Ekonomi Gagasan Anak Bumiputera Sarawak (Tegas) bekerejasama enggau Opis Pelajar, Pustaka Negeri Sarawak, All Aboard Young Leader Centre ( AAYLC), IEEE Curtin Malaysia enggau mayuh bengkah ejensi ke bukai.
Sama bisi datai ngulu pengawa nya Kaban Kunsil Nengeri ( ADUN) Telang Usan, Dennis Ngau, ngarika Menteri Muda Perambu Mengeri, Pengatur Tanah enggau Rampa Menua Datu Len Talif Salleh, Ketuai Pemesai Eksekutif Pustaka Negeri Sarawak Rashidah Bolhassan, Residen Miri Sherrina Hussaini sereta Pemesai Pelilih Miri Abdul Aziz Mohammad Yusuf.
Ngelansa silik agi, ku Manyin kebuah perintah deka fokus ngagai Jaku English laban dunya nyata kemaya hari, bisi beribu graduet universiti ti enda teulihka sebarang kereja.
“Bisi beribu graduet ti nadai bulih kereja, ukai ketegal nadai kereja, tang ke amat mayuh kereja dalam sektor peribit, ketegal sida lemi bejaku dalam Jaku English.
“Bisi mayuh sida ti ngembuan setipikit enggau diploma Technical Vocational Educational Training (TVET) enggau pengelandik sereta penemu ti betul, tang nyauka tetiap pekara manual ba tetiap sektor peribit dalam Jaku English. Nya alai mayuh bala nembiak kitai enggau setipikit tauka diploma TVET enda ulih bekereja ba sektor peribit,” ku iya.
Manyin mega nyemetak madahka pengangkun nembiak ba Sains enggau Matematik endang dipinta sereta pekara dikemerat.
“Enti sema nadai pengawa dipejalai dudi hari dikena nerenakka ulah angkun eng- gau andal ba penau sida belajarka Sains enggau Matematik antara bala anak kitai enggau raban nembiak, penampak jalai ngagai sida rebak baru tama ngagai makit kereja deka rapas agi.
“Nya kebuah opis menteri aku udah ngelala pangku pengawa nambahka penama bala nembiak kitai ngagai Science, Technology, Engineering, Mathematics (STEM) nyadi siti ari tiga batang fokus ba sekula sereta ngemanahka agi pengelandik bejaku ngagai bala pengajar enggau bala nembiak dalam English,” ku iya.
Ku iya, opis menteri iya udah ngaul diri enggau opis pelajar nengeri, semua universiti menua tu enggau palan TVET di nengeri tu; ejensi mansik, kompeni baka Sarawak Shell enggau Petronas sereta mega gempung ukai perintah bekaul ngambika ngaul diri ngemansangka Sarawak STEM Initiatives (SSI).
“Opis menteri begulai enggau Opis Pelajar Nengeri Sarawak (JPNS) diatu benung bejalai projek pemungkal ke alai sekeda sekula dipilih udah diberi bekal bup enggau kereban ngajar enggau belajar bukai ari National Geographic, dikena ngajar sains ba sekula primari. Enti ditemu pekara tu beguna, udah tu mayuh agi sekula deka diberi bekal ke sama.
“Opis menteri aku mega deka bekereja enggau JPNS matih pengajar ukai opsyen ti ngajar sains enggau matematik ba sekula primari. Nengah tu, kitai bisi juluk ngemanahka pangka bala pengajar tu ngajar sains enggau matematik ti ngasuh rindang sereta rindu belajar,” ku iya.
Kitai pechayaka semua tu (penyerakup) endang enda ulih dijapai enti sema kitai nadai ngembuan pengelantang raban bansa baka ke sehari tu, tu ukai ketegal BM. Ukai laban kitai enda ulih nyapai nengah BM, tang ketegal dia kelalu mayuh politik. Dato Sri Michael Manyin Menteri Pelajar, Sains enggau Pansik Teknologi