Ulah ‘vandalism’ meri pemar ngagai SMC nyendia perengka guna: Tiong
SIBU: ‘ Vandalism’ ukai pekara ke baru ditu kelebih agi ba taman rekreasyen mensia mayuh.
Chairman Kaunsil Mengeri Sibu (SMC) Datuk Tiong Thai King berasai asa laban mayuh penanggul vandalism nyadi.
“Vandalism suah nyadi lebuh perengka guna mensia mayuh diteju enda dijaga,” ku iya nyemetak madah ba pengawa nyiri komiti eksekutif baru Sibu United Chinese Graveyard Association (SUCGA) penggal 2018-2019 diatur di restauran Golden Happiness ditu, kena lemai Hari Lima tu tadi.
Kaunsilor Teo Boon Siew mujur dipadu nyadi presiden baru SUCGA nyilih Hu Yu Siong, ex-presiden Balai Dagang enggau Industri China Sibu.
Nyaut jaku Teo dulu ari nya, Tiong ke mega Kaban Kunsil Nengeri (ADUN) Dudong madah ketegal vandalism, SMC nyangka napi pemar nyendiaka penyikap perengka guna baka agu mensia mayuh ba kandang pendam.
Taja pia ku iya, raban kaunsil deka nyediaka agu mindah kin kitu nitihka peminta kelebih agi maya Ching Ming tauka festival sebayan.
Bisi peminta maya tu laban deka mayuh orang ngabas pendam sebayan sida, ku iya, seraya nambah, ba maya bukai, iya ditinggal enda dijaga.
Teo ti bejaku minta sekeda belanja ari kaunsil bekaul dikena ngaga baka agu mensia mayuh, nyeleti jalai enggau paking kerita ba kandang pendam ngambi meri penge- lantang enggau penyenang ngagai mensia mayuh.
Ku iya, kenyau ari SUCGA ditumbuh, iya udah ngengkahka pemerat ba program pemeresi enggau pemanah rampa ba kandang pendam.
“Kitai mega ngatur pekit pemanah rampa ninting taun. Kitai mega ngemanahka agi tikas pemeresi,” ku iya.
Ba lansa bukai, ku iya, iya bisi juluk ngatur pengawa nunu bangkai ditu dudi hari deka dijapai baka ti udah dikemeran ba mayuh menua baka Singapore enggau China ketegal suntuk tanah.
Iya ngarapka peranak ditu deka ngubah chara runding sida lalu nerima ubah jam ba jeman moden tu.
Bejakuka hari nya deka datai endur bejalaika nunu bangkai ketegal suntuk tanah, iya ngarapak GUCGA deka berunding sereta nyapai sempekat ba pemutus ti manah.