Pengawa enchuri ke majak nyadi di Gita ngirauka ati piak DBKU
KUCHING: Dewan Bandaraya Kuching Utara (DBKU) mantaika pengirau bekaul enggau pengawa enchuri ti majak nyadi kelebih agi ba kandang ngelingi Gita, Kuching.
Pemadu baru, Librari Komuniti DBKU Kampung Pinang Jawa udah diserungkai kena 1 Ogos 2018 tu tadi.
Asil pansik raban DBKU tetemuka sida ti enchuri tama ngagai begunan nya nengah jenila ba belakang librari nya.
Antara barang ti ditemu lenyau iya nya duit bayar ungkup nyadi kaban library, beberapa besi rak bup lama ba dalam stor, bingkai aluminium jenila ti semua nya udah dikempat lalu dichuri.
“Penanggul ngenchuri baka tu nyadi siti pengawa ti majak nyadi, kenyau ari suba nyentuk diatu.
“Pekara tu majak ngelekai ninting hari ke alai mayuh reta mensia mayuh udah dichuri sepeneka ati,” ku DBKU ba sebengkah penerang berita ditu kemari.
Ku DBKU nandu, ulah ti nadai tanggungpengawa tu udah ngundang bemacham komplikasyen ngagai raban perintah.
“Kebuah pia, ari ulah nadai tanggungpengawa tu, bejuta ringgit dibelanja perintah dikena nukar baru reta mensia mayuh ti dichuri,” ku DBKU nambah.
Nya alai, dikena nagang penanggul tu majak nyadi, DBKU minta peranak mengeri Kuching besaup enggau DBKU ngemunaska ulah baka tu ari majak ngelekai.
“Pechaya mih, nadai kerejasama ari peranak mengeri Kuching, pengawa ngemunaska ulah ngenchuri baka tu enda deka mujur.
“Peranak mengeri Kuching ti bisi sebarang penerang bekaul enggau penanggul baka tu tau telefon ngagai Palan Servis 24 Jam DBKU ba lumur 082-446644 tauka nengah Servis Pesan Pandak (SMS)/ WhatsApp ba lumur 016-8864466,” ku DBKU.