BYSTT enggau YBSTAR agi dibuka ngagai nembiak ti begunaka biasiswa
KUCHING: Peminta Biasiswa Yayasan Sarawak Tun Taib (BYSTT) enggau Yayasan Biasiswa Sarawak Tunku Abdul Rahman (YBSTAR) agi tebuka sereta lalu deka ditutup kena 15 Ogos 2018.
Direktor Yayasan Sarawak (YS) Azmi Bujang madahka biasiswa nya ungkup nembiak ti nampung pelajar ba bidang STEM ( Sains, Teknologi, Kejuruteraan, Matematik) enggau ke ukai ngambi bidang nya, ti benung belajar ba univerisiti.
“Sida ke ukai ngambi subjek STEM ulih minta Biasiswa Yayasan Sarawak Tunku Abdul Rahman (YBSTAR), lalu enti kita ngambi subjek STEM tau minta Biasiswa Yayasan Sarawak Tun Taib ( BYSTT), diatu benung tebuka nyentuk 15 Ogos 2018.
“Naka ke diatu, dalam timpuh sebulan kami udah nerima 807 peminta YB- STAR enggau 369 peminta BYSTT.
“Kitai ngarapka deka mayuh agi peminta, lalu endang 100 peratus biasiswa,” ku iya.
Azmi mansutka pekara nya dalam jaku pengelalu ba pengerami nyuaka Hadiah Pelajar Cemerlang Yayasan Sarawak 2018 ti dipenyadika Kepala Menteri Datuk Patinggi Abang Johari Tun Openg ti mega Chairman Yayasan Sarawak, ti diatur ba Dewan Serbaguna Swinburne University of Technology Sarawak Campus ditu, kemari.
Lebuh ke ngenang pasal loan ke bisi disediaka Yayasan Sarawak, Azmi madahka peminta jali nya tebuka belama sereta di proses tiap bulan, lebih agi pemutus peminta UPU udah pansut.
Berebak enggau tu YS numbuhka Yayasan Sarawak Student App sereta mujur dipenyadika Abang Johari nyerumba pengerami nya kemari.
Nitihku Azmi, aplikasi nya dikemansangka Yayasan Sarawak empu ti diketuaika Sapit Sekretari Perintah Nengeri Datu Mohamad Abdu Bakar Marzuki lebuh iya ke nyadi Direktor Yayasan Sarawak suba.
“Nengah aplikasi tu nembiak Yayasan Sarawak ulih nguruska peminta, jali, mansutka duit enggau pengawa mayar pulai baru deka lebih chakah dipejalaika.
“Nambahka nya aplikasi tu deka nyadung penerang enggau nyadi penyambung sereta pelasar ngagai nembiak ulih dipadah sereta nanya terus ngagai kami,” ku iya.
Naka ke diatu bisi 24,977 iku nembiak aktif Yayasan Sarawak, ku iya.
Lebuh ke ngenang pasal pengerami nya kemari, Azmi madahka taun tu bisi 1,432 iku nembiak nerima perasi nembiak nyulut YS 2018 ti nyengkaum 1,135 iku nembiak udah tembu SPM 2017 ti nambah ngagai 61 peratus dibandingka taun nyin kemari bisi 701 iku nembiak (SPM 2016) enggau 297 iku tembu STPM 2017 lalu bisi nambah ngagai 135 peratus dibandingka taun nyin kemari bisi 126 penerima (STPM 2016).
“Tu pemar ditapi YS, laban taun baru kitai patut chakah agi ngiga belanja dikena meri perais ngagai nembiak ti nyulut.
“Taun tu ari penyampau 1,432 iku nya, bisi 55 iku penerima ari bagi menua Kuching, Samarahan enggau Serian, ti nyengkaum 469 iku SPM enggau 82 iku STPM.
“Sida tu deka nerima setipikit ari YS, Sijil Simpanan Premium Bank Simpanan Nasional RM500 ungkup SPM enggau RM700 ungkup STPM,” ku iya.
Kelimpah ari nya, siku nembiak ti nerima Sijil Simpanan Premium Bank Simpanan Nasional 2015 nerima perais tikit benasit ari BSN iya nya Toyota Hilux.