Ulah ngiga pengaya nengah jalai salah baka makai suap meseti dipunas
SIBU: Perintah Pakatan Harapan (PH) ngemeranka chara ti alus sereta likun ari pengawa makai suap tauka beambi ulih ba atur numbuhka pemansang ba menua tu.
Menteri Kereja Raya Baru Bian madah, semua projek ti deka digaga deka dipenyadi ngena jalai lurus ngengkaum bekenaka chara tender tebuka.
“Perintah PH deka ngaga ubah (atur numbuh projek) enggau silik lalu dipejalai enggau chara berenggat.
“Ulah ngiga pengaya ari jalai salah meseti dipunaska.
“Makai suap enggau salah kena kuasa ba pengereja pengawa perintah enda ngira pangkat deka diperatika kitai enggau ransing,” pia ku iya madah.
Iya mantaika jaku tu maya bejadi Pengerami Hari Pengajar Renggat Pelilih Selangau 2018 di Sibu, malam ensana.
Sama bela datai maya tu iya nya Pemesai Opis Pelajar Selangau Jambai Sayong.
Baru mega pechaya bala pengajar ke datai ba pengerami nya nadai penanggul mandangka teladan ke manah bejalaika tanggungpengawa ngagai mensia mayuh.
“Ngena awak pengerami tu, aku mai kitai bela ngemeranka chara bejalaika tanggungpengawa ngena ati ti lurus.
“Genap iku kitai anang bechiping sereta lurus enggau diri empu lalu pia mega bala pemesai bela meseti ulah baka tu ngagai orang ke dipegai sida laban ulah tu patut dikerekai kitai belabuh ari singkang keterubah,” ku iya ngelalau.
Kelimpah ari nya, Kaban Parlimen Selangau nya ngarapka bala pengajar ba menua pesisir landik nempa chara nyaup apai indai nembiak napi ulah ke enda manah ti nyadi bepun ari pengawa bebai pangan diri.
Ku iya, bepelasarka ubah dunya maya tu, apai indai meseti nemu tanggungpengawa diri empu tang seraya nya pengajar enggau bala bukai ke besemak mega patut nyaup sida.
“Aku nemu tanggungpengawa nyadi pengajar tu berat laban ukai semina ngajar nembiak sekula aja tang piak pengajar bela besai reti ba pengawa mai mensia mayuh ngemeranka ulah ke manah lebih agi pengajar ti ngajar di menua pesisir.
“Ari piak kami enggau piak perintah, kami enda leju ngiga chara ti dipeda engkeman nempa mensia mayuh megai pemujur ba nama-nama pengawa ke dikereja.