Haribulan ke betul maya Sarawak merdeka patut ditemu, ku Yusuf
BINTULU: Ketuai bisi penau enggau beintegriti tinggi deka nentuka pemujur pengawa mensia mayuh empu ti mai pangka manah ngagai pengerembai besai politik, ekonomi enggau pekara rama, pia ku Menteri ba Opis Kepala Menteri ( Integriti enggau Ombudsman) Datuk Talib Zulpilip.
Tang ku iya, taja integriti tu muntang amat ditemu reti iya, tang lebuh datai ba pengawa ngemeran, iya deka nyadi tusah.
“Mensia mayuh suah bekenangka integriti tang sida enda berati amat enggau jarang ngemeranka iya, ke alai pemanah enggau pengilap bala ketuai deka nentuka pemujur tauka pemuntan menua,” ku Talib lebuh bejadika pengawa nutup program National Poetry Day 2018 (HPN) berambaika jaku ‘Integriti Pemacu Pembentukan Negara Bangsa’ di Balai Komuniti Kampung Jepak kena lemai Hari Enam tu tadi.
Kaban Kunsil Nengeri ( ADUN) Jepak madahka dikena ngetanka konsep integirti kelebih agi ba atur pengawa, semua orang patut bejalaika pangku pengawa enggau tanggungpengawa sida memanah.
“Tu ukai tanggungpengawa perintah tauka kepala menteri kediri aja tang tu tanggungpengawa kitai begulai,” ku iya nandu.
Nya alai ku iya, program HPN ti diatur di Bintulu taun tu enggau rambai jaku ngaul konsep integriti dikena meransang nempa menua endang patut ba jam iya nerenakka integriti enggau ngemeranka iya, ukai semina ba atur pengawa aja tang ba semua renggat dalam komuniti.
Ari program tu, Talib pechaya teladan enggau pangka ari konsep integriti ulih diasai di renggat baruh.
Lebih ari 300 pesereta ari Malaysia enggau menua bukai ti besemak ngambi bagi ba program tiga hari berunggu, tumu agi dipenyadika Menteri Pengintu Pengelantang Pendiau, Komuniti, Indu, Ruang Bilik enggau Pemansang Anak Mit Dato Sri Fatimah Abdullah ngarika Kepala Menteri Datuk Patinggi Abang Johari Tun Openg di Hotel Kemena Plaza.
HPN 2018 diatur begulai Perintah Nengeri Sarawak, Dewan Bahasa dan Pustaka ( DBP) enggau Gabungan Penulis Nasional (Gapena).
Ketuai 1 Gapena, Datuk Zainal Abidin Borhan madahka program 21st HPN di Johor deka diatur dalam taun 2020 dikena ngelai Gapena genap taun Ke-50 ti udah ditumbuh kena 23 Oktober 1970.
Ku iya Gapena bekerejasama enggau DPB deka nampung pengawa ngatur aktiviti dikena ngetanka pengawa bekenaka Jaku Melayu enggau terus meransang litericha Melayu kelebih agi ngagai raban nembiak. SARIKEI: Taja Sarawak udah nyapai kuasa merintah diri kena 22 Julai 1963, tang reti hari bulan nya enda ditemu tebal agi peranak Sarawak.
Jaku tu disebut Kaban Parlimen ( MP) Tanjung Manis, Yusuf Abdul Wahab lebuh bejadika pengawa ngintu Hari Sarawak Merdeka Renggat Bagi Menua Sarikei ditu kemari, 4 Ogos, madahka iya enda nemu nama kebuah ke amat di baruh pekara nengeri.
Taja pia, iya pechaya siti ari kebuah nya ketegal silap ba penerang dikenatai ngagai rayat, kelebih agi bala nembiak sekula.
Ari peneleba iya empu, iya nadai kala terundingka pen- erang pasal Sarawak nyapai kuasa merintah diri empu ari Koloni British lebuh jeman besekula, ku Yusuf.
Bup sejarah kitai semina nyebut 31 Ogos nyadi Hari Merdeka Malaysia ke alai pekara nyata Hari Merdeka Malaya, ku iya nerang, seraya nambah, ke amat, Malaya nyapai kuasa merintah diri ba hari bulan nya dalam taun 1957.
Baka ba Sarawak, kebendar nyapai kuasa merintah diri ari British kena 22 Julai 1963 lalu urung dua bulan udah nya, kena 16 September 1963, Sarawak begulai enggau Malaya, Singapore enggau Sabah numbuhka Malaysia, ku Yusuf nerang silik.
“Sehari tu kitai laun ngintu Hari Merdeka Sarawak (22 Julai) lalu kena 16 September ti deka datai, kitai deka ngintu Hari Malaysia. Taja hari Malaya megai kuasa merintah diri mega diintu kena 31 Ogos.
Seraya program dipun enggau sesais aerobik pagi ba laman puang betungga enggau palan sivik ditu, dientudika Bicycle Fun Ride lalu udah mujur rejista 120 iku pesereta.
Genap iku pesereta ti mujur nembuka Bicycle Fun Ride nerima setipikit enggau midul.
Program mega udah meda kelai pengawa nyuaka tambai nengeri ngagai empat iku ket- uai komuniti menua tu.
Pengawa mandang mit mega bisi diatur mayuh bengkah opis perintah di lobi Wisma Jubli Mutiara beserimbai enggau atur program sehari nya.
Sama bisi datai Residen Sarikei, Mohamad Junaidi Mohdin, Sapit Residen, Abang Mohd Porkanj Abang Budiman, Pemesai Pelilih Sarikei, Christopher Ranggau, Pemesai Pelilih Julau, Khalid Andong, Pemesai Pelilih Pakan, Seroji Ludin, Pemesai Pelilih Meradong, Harun Mahidi, Sekretari Kaunsil Pelilih Sarikei, Henry Jalin, bala ketuai ari mayuh bengkah opis sereta bala ketuai komuniti menua nya.