Sentimen S4S udah salah kena ketegal ti dikeruga sekeda raban politik ungkup tuju ke enda manah, ku Wong King Wei
KUCHING: Propaganda ti deka nyerara sereta ngeruga penyerakup enggau penaluk rayat ke nengeri Sarawak sereta menua Malaysia patut diketu sereta enda diterima rayat menua tu.
Kaban Kunsil Nengeri (ADUN) Padungan, Wong King Wei madahka sentimen Sarawak for Sarawakian (S4S) salah kena sereta udah dikeruga seraban politik ke ngembuan agenda ti enda manah.
Ku iya, agenda nya ngemeranka propaganda ti deka ngeruga tauka nyeraraka Sarawak tauka Sabah enggau Semenanjung Malaysia.
Kitai tu rayat Sarawak
Sentimen Sarawak for Sarawakian (S4S) udah salah kena sereta dikeruga seraban politik ke ngembuan agenda ti enda manah. Wong King Wei ADUN Padungan
lalu dalam timpuh ke sama kitai mega rayat Malaysia, lalu Malaysia tu menua kitai sereta Sarawak sebagi ari Malaysia, ku Wong.
“Sentimen Sarawak for Sarawakian (S4S) udah salah kena sereta dikeruga seraban politik ke ngembuan agenda ti enda manah.
“Kitai ulih meda baka ni propaganda ba agenda sida, propaganda sida deka ngeruga sereta nyerara kitai ari Malaysia sereta agenda tu patut diketuka tauka enda diterima.
“Tu agenda dikena sida dikena nutup tauka ngambika enda ngingatka penyai tauka penyalah makai suap ke nyadi,” ku iya.
Wong mansutka pekara nya lebuh ti bejaku seraya bejadika ‘ Kempen Kibar Jalur Gemilang Peringkat Negeri Sarawak 2018’ ti diatur Opis Pemadah Malaysia ba Sekula Sekondari (SK) Lumba Kuda, ditu, kemari.
Ngenang silik pekara nya iya madahka kena 22 Julai (722), 31 Ogos (831) enggau 16 September (916) iya nya hari bulan ti amat besejarah ngagai Sarawak sereta patut sama dikeingat, dikerami sereta diintu rayat nengeri tu ti mega ke nyadi rayat Malaysia.
Sejarah nya ku iya patut diajar sereta diterangka ngagai rebak baru enggau dudi di menua tu.
“Bekaul enggau tiga iti hari bulan iya nya 831,722 enggau 916, endang patut kitai ngibauka Jalur Gemilang dalam timpuh tu.
“722 ukai semina pasal Sarawak tang semua rayat Malaysia patut sama gaga ati ke kemerdekaan Sarawak, lalu 831 ukai semina bekaul enggau Semanjung Malaysia aja tang semua rayat Malaysia patut sama gaga ati sereta sama ngerami, sereta 916 iya nya Hari Malaysia ke alai hari kitai semua ngingatka iya sereta ngerami iya.
“Kitai patut ngajar tauka nerang ngagai rebak dudi bekaul enggau sejarah tu betul, ngambika sida bulih penerang tauka pelajar ti betul pasal sejarah Malaysia. Lalu konsep transformasi nya patut diajar berengkah ari pelajar ti bepun ari sekula,” ku iya.
Bejaku baru iya madahka semengat taluk ke menua sereta pengawa ngibauka Jalur Gemilang berengkah ari pelajar enggau ari dalam ati raban biak sereta ukai patut nyadi propaganda.
Kelimpah ari nya, Direktor Opis Pemadah Malaysia Sarawak Abang Sardon Abang Hashim dalam jaku pengelalu pengeramiu madahka, SK Lumba Kuda dipilih nyadi palan endur ngatur kimpin nya seraya dikena ngingatka sejarah sekula nya.
Iya madahka dulu suba sekula nya sebengkah palan ke endur ngatur pekit lumba kuda ke patut dikeingat sereta ditankan, pia mega nama lumba kuda pan ulih padam enti enda dikeingatka sejarah iya.
“Signifikan sekula tu dipilih kami endur ngatur kimpin tu laban pengaya sejarah sekula tu.
“Sehari tu kitai nguji deka ngingat baru transformasi Kuching ke nyadi palan lumba kuda ke lalu nyadi elemen pemadu beguna sereta nyadi ikon,” ku iya.