SAINTEX’18, STEM Playground deka dirichah enggau mayuh macham program

SIBU: Program Pemansang Inovasyen enggau Teknologi 2018 (SAINTEX’18) enggau STEM Playground ke diatur ba Universiti Kolej Teknologi Sarawak (UCTS) deka disempulang enggau macham bengkah program.

Chairman komiti pengatur ti mega Sapit Mandal Canselor ( Pelajar) UCTS Prof Dato’ Dr Sabarudin Mohd madah, SAINTEX 2018 deka berengkah pagila (9 Ogos) nyentuk 11 Ogos lalu ditangkan STEM Playground kena 11- 12 Ogos tu.

“Dua bengkah program tu diatur begulai UTCS enggau Tabung Ekonomi Gagasan Anak Bumiputera Sarawak ( TEGAS), Opis Menteri Pelajar, Sains, Teknologi enggau Pemansik, Opis Multimedia Sarawak (SMA) enggau Yayasan Sarawak.

“Kelimpah program pemandang, program tu mega bisi ngatur pekit lalu naka ke diatu kitai udah nerima 29 iku penyereta,” pia ku iya ba aum media ditu, kemari.

Dr Sabarudin madah, dalam kandang empat hari nya, penyereta ke ngambi bagi deka mandangka asil produk sida.

“Awak tu dikena kami meri sida endur mandangka pengelandik sebedau mai asil ke digaga nya ngaga renggaty nangkan ke tu baik nya dikemanahka agi tauka dijual,” ku iya nerang.

SAINTEX’18 ku iya, ukai semina ngemeratka pengawa mansik ba institusyen pelajar aja tang bela dibuka ngagai mensia mayuh.

Iya madah, iya nemu agi mayuh asil enggau inovasi ke digaga mensia mayuh ti tau ngelempungka pengawa besehari- sari nyengkaum chara lama ti enda bekenaka teknologi tang meri asil ke manah amat.

Bekaul enggau STEM Playground, Dr Sabarudin madahka UCTS ngembuan juluk ati deka ngangkatka pelajar STEM ba nembiak sekula.

Pekit ke diatur nya dibagi ngagai tiga kategori iya nya kategori Produk ti tebuka ngagai semua enda milih ari menua bukai, Kategori Akar Umbi (tebuka ngagai peranak menua tu aja) enggau Kategori STEM (nembiak sekula).

Sama bela datai maya aum media tu iya nya Sapit Chairman Komiti Pengatur SAINTEX’18 Prof Dr Ramli Rashidi enggau Chairman STEM Playground Prof Dr Sim Yee Wai.