Penanggul bekal ai di Marudi deka diputar nengah program SANR
KUCHING: Penanggul bekal ai ke ditapi mensia mayuh ba pelilih Marudi nyengkaum RPR Sungai Pasir udah dipasukka dalam program ‘Stress Area Northen Region’ (SANR), ti nyadi sebengkah chara dikena mutarka isu nya dalam timpuh panjai.
Bepelasarka penerang berita Opis Menteri Bekal Ai enggau Elekterik Menua Pesisir madahka piak opis menteri enggau Opis Bekal Ai Menua Pesisir (JBALB) Bagi Menua Miri enggau naka ulih mutarka penanggul ai ba kandang menua nya.
“Dikena napi tauka mutarka isu tu dalam timpuh panjai, kandang menua tu udah dipasukka dibaruh program ‘Stress Area Northern Region’ (SANR) sereta udah bulih pemendar ari YAB Kepala Menteri Sarawak.
“Naka ke diatu, agi dalam proses ngelangkar paip enggau ‘booster pump’ baru, sereta dipelaba dipansutka tinda projek ba bulan November 2018,” ku penerang berita Opis Menteri Bekal Ai enggau Elekterik Menua Pesisir, kemari.
Opis Menteri Bekal Ai enggau Elekterik Menua Pesisir Sarawak nengah JBALB meri penerang bekaul isu bekal ai ba RPR Sungai Pasir dalam Pelilih Menua Marudi pengudah nerima riput ari JBALB, bepelasarka riput media dalam surat kabara The Borneo Post ti betajuk ‘Sg. Pasir resident left without water since Friday’ kena 2 Ogos 2018.
Sebedau tu opis menteri bisi dipadahka JBALB (JBALB) Sarawak iya nya RPR Sungai Pasir dalam pelilih Marudi betapi enggau isu nadai bekal ai berindik ari kena 28 Julai 2018 bisi insiden ke alai pam ai mata dilanggar sebuah bot tunda ngunjungka paip besai kena keruga.
Piak JBALB udah minta kunteriktor ngemanahka baru paip nya, lalu kena 29 Julai 2018 pengawa ngemanahka nya mujur dipejalaika enggau bantu kapal kren, dikena bejalaika pengawa nyambung baru paip besai nya.
“Ketegal kes nya, serata kandang menua Marudi betapi enggau penanggul nadai bekal ai nyengkaum kandang endur RPR Sungai Pasir. Lalu notis nadai bekal ai nya mega udah dipansutka JBALB ngagai penguna ba kandang menua nya,” ku penerang nya.
Kelimpah ari nya, penanggul bekal ai ba kandang endur RPR SUngai Pasir mega ketegal tikas pengelaju ai ti lubah laban gaya paip ti ‘under size’ sereta pengawa ngemanahka agi paip nya patut dipejalaika.
Nambahka nya kandang endur PRP Sungai Pasir nya semak enggau kandang endur taman Flat Serbaguna Dayuh. Lalu kandang endur nya ngena dua ‘pressure pump’ dikena nyintak ai ke kandang endur nya ngujungka bekal ai ngagai kandang endur RPR Sungai Pasir nyadi kurang.
Tangki endur nyimpan ai ti disediaka nama ke diatu mega enda ulih nangkup peminta guna peranak ba RPR Sungai Pasir ti majak nambah. Lalu kandang endur tu mega begunaka timpuh ti lama ‘ recovery time’ pengudah pengawa ngemanahka loji bekal ai mata dipejalaika.