Perintah nengeri bejalaika projek ‘Green Market’ di Kapit ba taun 2019
KAPIT: Perintah nengeri nengah Opis Menteri Kaunsil Kandang Menua enggau Pengawa Berumah (MLGH) Sarawak benung ngepunka projek ‘ Green Market’ ti dipelaba deka dipejalai dalam taun baru.
“Komponen besai enggau konsep ‘Green Market’ datai ari kompos, sistem ngena baru enggau sistem nimbun ai ujan.
“Dikena nyapai juluk tu, perintah nengeri udah ngagihka urung RM5.2 juta ti deka diagih bela ngagai semua 26 raban bekuasa menua tu di nengeri tu ngambi bejalaika konsep ‘ Green Market’,” pia ku Ketuai Pengerai Mensia Mayuh Bagi Menua ba MLGH Sarawak, Dr. Cheong Yaw Liang lebuh ngetuaika Aum Pengerai Mensia Mayuh Nengeri Kedua, apin lama ke udah.
Aum udah diatur di bilik konferen di Kaunsil Pelilih Menua Pesisir Sibu (SRDC) lalu udah digulu bala Penulung Pemesai Pengerai Rampa Menua ti ngarika 26 raban bekuasa ari selampur nengeri.
Rambau aum nya, bala pesereta ngulu penerang ari tiga vendor bebida enggau kompeni ti nyediaka injin iya nya Bio-Mate Composting/ Fermentation Machine, Sustainable closed- loop Food Waste-2-Energy and Food Concept ari Cowtec enggau Earth System Organic Waste Fast Treatment Technology ari Yut Leong Marketing Company.
Tambah mega bala pesereta bisi diterang senentang Inisiatif Makit Gadung, jerita pemujur ari Majlis Bandaraya Kuching Selatan (MBKS).
Ngelansa pasal atur pengari Makit Gadung, pengudah dipejalai iya, ku Dr. Cheong, iya deka dipejalai raban Komiti Makit ari pengari kaunsil menua nya laban tu projek ti ngaul kaul raban komuniti enggau bala pesereta.
Aum nya mega bisi bejuraika pemansang ari ‘ simple teaching kit’ ba chara bebe- laka pemakai enggau pekara pemeresi sereta numbuhka ‘Kod Etika Sistem Premis Makanan 2018’.
Langgur penemu bukai nyengkaum pengawa meresa antara balai bekaul enggau pekara pengerai mensia mayuh di baruh Local Key Result Area (LKRA) enggau Standard Operation Procedures (SOP) ungkup agu mensia mayuh.
Ba jaku simpul Dr. Cheong meri peransang bala Penulung Pemesai Pengerai Rampa Menua ti biak, umur biak ari 45 taun nampung sida ngambi master enggau kus degree bekaul dikena ngemanahka agi pejalai kereja sida dudi hari.