Fatimah dichiri nyadi penyanding penemu PROFES 2018-2020
KUCHING: Menteri Pengintu Pengelantang Pendiau, Pengelantang Raban Bansa, Orang Indu, Ruang Bilik enggau Pemansang Nembiak Mit, Dato Sri Fatimah Abdullah sekali agi dichirika nyadi penyanding penemu Persatuan Perkembangan Profesionalisme Pendidikan Sarawak ( PROFES) Sesi 2018-2020.
Fatimah ti dipilih baru nyadi penyanding penemu PROFES nya dipadahka Chairman iya Dr. Zulwali Kifli Merawi, maya ti nyadi ketuai penemuai basa raban Komiti PROFES 2018-2020 ngagai Opis Menteri nya.
Lebuh ke ngenang pasal PROFES, Fatimah madahka ditumbuhka kenyau ari taun 1998 ti mekuh ngagai pemansang raban pengajar.
“Tuju penemuai sida ngagai aku seharitu meri kelala kaban komiti sida lalu madahka aku sekali agi dipilih nyadi penyanding penemu sida. Bepelasarka lis komiti tu nyangkaum ti benung gawa sereta udah pinchin, tang sida udah mayuh bepenelaba lalu ulih bekunsika nya enggau pengajar.
“Pekara ke dua sida bejuraika aktiviti ke udah sereta deka dipejalaika semanjai taun tu enggau aktviti ke deka diatur sepemanjai taun 2019 enggau 2020, ti mekuh ngagai pemansang pengajar.
“Pekara ke-3 ke dibantaika sida ngagai aku, bisi siti aktviti ke dikemekuh sida iya nya mansutka jurnal,diatu sida bisi 17 buah jurnal diasilka PROFES lalu batang berita jurnal nya pasal pansik ke digaga pengajar, kaban PROFES sereta pengelicha,” ku iya seraya madahka jurnal nya amat beguna ngagai raban pengajar.
Fatimah mansutka pekara nya lebuh ti bejaku dalam aum pengarang berita pengudah nerima penemuai basa komiti PROFES Sesi 20182020 ba opis iya di Bangunan Baitulmakmur ditu, lemai kemari.
Entara aktivit ke diperambu dipejalaika dalam taun tu baka bengkel nulis keretas perambu pemansik/ tesisi ungkup pengajar ti bisi juluk deka nyambung pelajar ngagai renggat Sarjana enggau Kedoktoran; Bengkel Teknik Bacaan Hebat Untuk Guru- Guru Daerah Bau sereta Samarahan (ungkup pengajar sekula sekonmdari enggau primari); Bengkel Teknik Menjawab Kertas Pengajian Am Zon Kuching/ Samarahan ( Pengajar Pengajian AM) enggau ke bukai.
Nambahka nya ungkup taun 2019, PROFES merambu ngatur bengkel ‘Student Centred Learning in the English as a Second Language Classroom” ti deka diatur ungkup pengajar BI sekula primary Pelilih Menua Padawan, Mukah, Sri Aman enggau Pelilih Menua Saratok; Workshop on Multiple Intelligence for Teacher ungkup pengajajar sekula primary enggau secondary; International Conference on Teaching and Learninag Through Games II ungkup pengajar, lecturer IPG, IPTA, pegawai JPN enggau KPM sereta mayuh agi aktiviti bukai ti udah dilanggur.
“Gerempung tu bisi ngatur aum besai renggat antarabansa begulai enggau ejensi ti bekaul, nengah tu sida ulih bekunsi pemandai enggau penemu.
“Kami mega bisi minta bantu PROFES ngatur bengkel ungkup pengajr prasekula sereta nya alai enggau ati tebuka opis menteri sereta pengajar pra-sekula amat ngelalu sereta nyambut manah gerempung tu ngatur bengkel,” ku Fatimah.
Sama bisi dalam aum pengarang berita nya kemari, Dr. Siti Zaliha Reduan ari Bahagian Pembangunan Awal Kanak-Kanak sereta kaban komiti PROFES ke bukai.