Renggat keterubah Projek BATM ti ngena sistem RBF enda nyapai tuju

KUCHING: Renggat Keterubah Projek Bekal Ai Tanjung Manis ( BATM) ba pengawa mindahka 125 JLH (juta liter sehari) ai mata ari Sungai Maaw, Sibu, bekenaka sistem River Bank Filtration (RBF) nengah stesyen pam ai mata ngagai Tanjung Manis diperati enda nyapai tuju projek nya.

Ripot Ketuai Audit Menua Siri 1/2017 madahka pengawa audit ti dipejalai antara Oktober ngagai Disember 2017 ngayanka projek nya enda nyapai tuju pengudah puntan tembu ba timpuh ditetap lalu kunteriktor enda tetangkupka tanggungpengawa nembuka projek nitihka spesifikasyen kunterik.

Kenu ku iya, Renggat 1 BATM bisi tiga komponen besai iya nya ngemansangka pemansut ai mata, sistem mindah sereta palan meresi ai nyengkaum sistem nyam- bung ai ti udah diperesi, lalu tu dipejalai ba lapan pakej berengkah ari 11 Nov 2013, nitihka pematut tembu kena 10 Nov 2015 enggau belanja asal projek beungkus RM848.40 juta.

“Taja pakej dua ngagai lapan udah tembu, tang pengawa nguji enggau ngenuku/ pertauliahan enda ulih dipejalai laban pemuntan pakej satu, ti ngemai pangka pakej dua ngagai lapan enda ulih diserenih, ngujungka kesemua Projek BATM Renggat 1 puntan ngepunka operasyen sereta enda ulih meri pemaik ngagai industri akuakultur Halal Hub enggau peranak di Tanjung Manis.

“Pengawa ngatur Projek BATM enda nyapai tikas penyikar gawa ti optimum laban bisi besibil dalam kunterik ari sukut spesifikasyen kereja ti enda nitihka gaya langkar asal sereta nadai pe- mendar betulis ari Pemesai Penguasa ba gaya langkar ti baru ari kunteriktor,” ku iya.

Ketegal pemuntan nya ku iya udah ngeruga kepentingan perintah ngulihka nilai faedah ari sepenyampau RM902.70 juta ti udah dipelanja, nyengkaum asil diulih ari paip penyampau RM12.02 juta ngelui ari peminta ke amat ti ngasuh tebasau ngapa.

Sebagi ari 125 JLH nya ngambika disambung ngagai palan meresi ai ngembuan kapasiti 30 JLH, lalu diperesi ungkup peminta peranak ngelingi Tanjung Manis, enggau Kaunsil Ai Sibu (LAS) dipadu nyadi ejensi bejalaika pengawa ngarika raban Opis Menteri Bekal Ai enggau Elekterik Menua Pesisir Sarawak (KUS) ti nyadi Pemesai Penguasa projek nya.

Kena 25 Julai 2013, perin- tah nengeri ngemendarka agih belanja penyampau RM1.06 biliun ungkup Perbekalan Rancangan Malaysia ke-10 lalu dipelanja nengah bon perintah.

Projek BATM Renggat 1 dikena meri bekal ai mata ngagai peminta industri akuakultur di Halal Hub Tanjung Manis udah berengkah dalam bulan November 2013 seraya projek BATM Renggat 2 apin dipun.

Nitih ku iya, antara pekara besai ti patut diperati ba audit projek tu iya nya bekaul enggau pengawa ngatur projek ti enda mantupka ati, pansik nyangka enda dipejalai, asil diulih ari paip enggau kereban ti berega RM12.02 juta ngelui ari peminta, pengawa nguji enggau meri kenuku/ pertauliahan enda ulih dipejalai sereta kualiti kereja ngaga projek enda ngemuaska ati. — Bernama