Dikena ngelakuka main asal di menua tu ti nyelai sereta ngubah runding orang luar bekaul chara idup peranak di nengeri tu
BINTULU: Raban graduet menua tu patut bejalaika pangku pengawa sida nyadi kaban komuniti ti ulih ngerembaika main asal peranak di menua tu ti nyelai ba tetiap endur ti bisi di menua tu.
Kaban Parlimen ( MP) Bintulu ke nyadi Penyanding Penemu Kehormat GRADUAN Malaysia Datuk Seri Tiong King Sing madahka raban graduet tau nyadi duta ngelakuka pekara budaya ti nyelai di menua tu ngambika ditemu mensia mayuh sereta enda ngasuh salah peragam.
“Peragam ti salah bekaul enggau chara idup peranak Sarawak nyengkaum di Sabah ari peranak luar ti ngumbai agi idup ngena chara lama, kebendar nya nadai agi, tang diatu sida udah idup chara moden semina agi meruan ngetanka adat enggau main asal lama.
“Raban graduet ulih nyerenih sereta mida semua penerang ti mayuh ditabur ba media rama bekaul enggau sekeda isu enggau chara idup komuniti di menua tu ngambika sida ti deka nampung pengawa nyadi ketuai dudi hari ulih nyadi ketuai ti sikar gawa sereta bepenem,” ku Tiong.
Iya mansutka jaku tu ba Pengawa Bejadika GRADUAN National Inter-Varsity Culturak Camp Ke-4 di Rumah Robert Tugang di Suai bedau lama.
Ba pengawa nya, Tiong bisi nyauka pemeri 150 bup kelai sukung ngagai Program Librari Mini di rumah panjai nya sereta meri awak ngagai peranak dia ngiri penemu nengah bemacham bansa pekara dibacha di librari nya sereta muka runding enggau nambahka penemu sida berunding.
Inisiatif enggau sukung ti diberi nerima timbal chukup manah ari peranak dia laban tu deka nambahka tikas pelajar bala anak sida kelimpah nyadi siti ari program chukup berega meri peransang ngagai sida dia ngambika regas agi ba pengawa macha bemacham pekara ari bemacham disiplin penemu.
Seriris enggau pemansang nengeri tu, kelebih agi mengeri Bintulu, Tiong mega bisi nerang pemesai guna modal mensia enggau penau ti dipinta dikena nyaup pemansang ke bisi sereta nerima penatai bala graduet nempa batang kereja sida empu di mengeri minyak enggau gis nya.
Berebak enggau nya, Presiden Graduan Muda (GRADUAN) Malaysia Lee Seang Hock madah, sejarah udah ditempa pengudah kem nya mujur ngempuru 220 iku raban elit enggau ketuai gempung palan pelajar tinggi ari serata menua.
“GRADUAN Malaysia mega ngelancharka Program Librari Mini beserimbai enggau GRADUAN NIVC Camp 4.0 lalu disukung semua pesereta, udah mujur ngempung 480 bup bemacham bansa nyengkaum bup nembiak mit, biografi pemesai, fiksyen, hak-hak sivil enggau ke bukai,” ku iya.
Iya nyemetak nerang pasal pemesai guna penemu ti tau ngubah idup sida sereta endang meri peransang ulah macha ngagai bala komuniti.
Lee mega madahka projek ti dipejalai nya ulih meri runding sida bekaul enggau pemesai guna penemu ti tau mutarka bemacham penanggul ba pengidup bala komuniti.
Tuai Rumah Robert Tugang ngelalu pengawa ngatur program ti deka meri peransang ngagai rebak biak enggau nembiak mit di rumah panjai nya ngangkatka tikas pelajar sida.
Iya meri langgur penemu ngambika Balai Mayuh Guna enggau Librari besai ulih digaga ba dia dudi hari ngambika ulih ngangkatka tikas pelajar peranak dia kelimpah mantu nempa mayuh agi raban profesional ari rumah panjai ti deka gawaka komuniti.
Dulu ari nya, program udah diatur tiga hari berunggu lalu tembu kena Hari Dua tu tadi, 5 ngagai 7 Oogos, ngaul 28 gempung Palan Pelajar Tinggi di baruh pegai GRADUAN Malaysia.
Sepenyampau 220 siswa enggau siswi ari selampur Malaysia ngulu program tu dibai ngasai sereta meretika penyelai chara idup enggau budaya raban bansa Iban di Sarawak.
Sama bisi datai lebuh bejadika program tu, Ahli Dewan Negara ke lalu nyadi Penyanding Penemu Strategik GRADUAN Senator Prof Emeritus Tan Sri Dato’ Seri Dr Ibrahim Shah Abu Shah, Ahli Dewan Negara Senator Datuk Paul Igai, Ketuai Kem NIVC 4.0 Joy Lim Wan Yu sereta 32 iku pengari ari gempung perintah enggau ukai perintah di Bintulu.
Pengawa bejadika kem NIVC nerenakka budaya menua tu, simulasyen ngintu Hari Gawai sereta nerenakka pekara talukka menua nyerumba Bulan Meredeka Malaysia nengah bemacham aktiviti ti diatur, dikearap bala pesereta deka ngenang jasa sida ti gawa negika meredeka sereta nunda semangat penyerakup baka ti diayanka peranak rumah panjai.
Kelimpah ari nya, penerang silik bekaul enggau kes tau ngelawa website Facebook rasmi kem NIVC di www. facebook.com/NIVCamp.
Peragam ti salah bekaul enggau chara idup peranak Sarawak nyengkaum di Sabah ari peranak luar ti ngumbai agi idup ngena chara lama, kebendar nya nadai agi, tang diatu sida udah idup chara moden semina agi meruan ngetanka adat enggau main asal lama. Datuk Seri TIong King Sing MP Bintulu