Kelab 4x4 Kapit udah nyuaka bantu RM3050 ngagai Nisia

KAPIT: Kelab 4X4 Bagi Menua Kapit bisi nyuaka bantu mata duit penyampau RM3050, ari pupu bala kaban kelab ngagai siku nembiak, Nisia Jua Anak Ngabong, ngambika iya ulih nampung pelajar ngagai Pom Satu di Sekula Sekondari (SMK) Selirik.

Sekretari kelab, Mathew Jeffery Lebak disempulang bala bukai, ngetuaika pengawa nyuaka bantu ngagai Nisia di sekula iya, apin lama ke udah.

Sama bisi datai ngemata pengawa nya, prinsipal sekula, Jarit Jarmit enggau sekeda bala pengajar.

Ba jaku dipansutka iya, Mathew meri terima kasih ngagai bala kaban kelab ti udah gerah jari mantu Nisia bebelika kereban dikena besekula.

“Bantu tu nyangka mit tang pekara pemadu beguna iya nya bala kaban bisi ati keran, bepupuka belanja, nentuka Nisia ulih nampung pelajar iya.

Nisia, nembiak primari enam ari Sekula Primari (SK) Nanga Encheremin, sebuah sekula menua pesisir di Batang Rajang, teulihka pemutus 5A enggau 1B ba Ujian Penilaian Sekolah Rendah (UPSR) nyin tadi.

Ketegal penyeranta, apai indai iya enda tetangkupka belanja nganjung Nisia nampung pelajar lalu udah tinggal lapan bulan ba pelajar, kenyau ari sekula buka dalam pun taun tu tadi.

Ex-pengajar kelas nembiak tu benama Siti Aminah Othman udah mantaika penerang pasal Nisia nengah raban media rama. Iya madahka diri enda nemu riya Nisia pengelama lapan bulan lalu mujur betemu kena 27 Julai tu tadi.

Iya chukup sinu meda Nisia enda ulih nampung pelajar ketegal penyeranta taja teulihka pemutus nyulut ba UPSR 2017.

Keran deka meda Nisia nampung pelajar ungkup pemujur pengidup iya dudi hari, Siti berengkah ngatur pengawa ngiga belanja ari raban ti bisi pengasih, dikena mantu Nisia.

Nitih ku penerang, Nisia udah rejista diri empu di SMK Selirik disempulang Kepala Pengajar SK Nanga Encheremin begulai enggau sekeda pengajar ari sekula nya, nampung pelajar ba Pom Satu.