SB deka ngatur aum besai dikena nentuka kuing parti nya

SIBU: Sarawak Baru (SB), siti gempung parti ti dikeringka parti politik asal nengeri Sarawak deka ngatur aum besai dikena berandauka kuing parti nya.

Gempung parti SB tu disempulang Parti Bansa Dayak Sarawak Baru (PBDSB), Sarawak Workers Party (SWP), Parti Tenaga Rakyat ( Teras) enggau State Reform Party Sarawak (STAR).

Kelimpah SB, Pengawa Bepilih Nengeri (PRN) ti deka diatur ba taun 2021 deka mandangka Sarawak bela bisi Gabungan Parti Sarawak (GPS) kelimpah Pakatan Harapan (PH).

Presiden SWP, Munan Laja maya berandau enggau pengarang berita ensana madahka aum besai nya deka diatur kena 12 Ogos tu ba sebuah hotel tebilang di Sibu.

“Aum besai SB tu ila deka digulu tiga iku pemesai ari tiap bengkah parti kelimpah presiden berandauka kuing penumbuh SB sebedau sida ngenataika ripot ari aum nya ngagai presiden parti diri empu,” pia ku iya nerang.

Iya mega madah, naka ke diatu pemesai ba SB tu iya nya semua empat iku presiden dalam parti nya sebedau siku dipilih nyadi ketuai sida ila.

Nambahka nya Munan bela madahka penumbuh SB bepun ari ‘pekara baru ti dikedeka peranak nengeri tu ngelama tu’.

“Udah rayat pechayaka PH nyadi perintah, pen- gandal rayat endang besai ngagai PH.

“Tang pemujur sida bejalaika pengawa naka ke diatu empai tepantup ba peneka rayat,” ku iya madah baru.

Ku iya, iya pechaya SB deka bulih pengelantang enggau pemujur dudi hari ila laban penyerakup parti sida nadai ditating isu ke enda manah tauka isu lama sereta beresi ari ngereja penyalah ti nejuka penumbuh sida seririh enggau pengingin rayat ditu.

“Kami agi baru, kami nadai penanggul taja PH megai menua nyilih Barisan Nasional (BN).

“Rayat diatu randaka pekara ti baru,” pia ku iya.

Enti SB bisi empat komponen parti, GPS mega dikeringka empat komponen parti iya nya Parti Pesaka Bumiputera Bersatu (PBB), Parti Sa’ati Rayat Sarawak (SUPP), Parti Rayat Sarawak (PRS), enggau Parti Progresif Demokratik (PDP).

Ba PH, sida bisi Parti Keadilan Rakyat (PKR), Parti Tindakan Demokratik (DAP) enggau Parti Amanah Negara (AMANAH), semua tu parti asal ari Semenangjung Malaysia.

Kelimpah ari nya, politik ditu mega mandangka Parti Rakyat Bersatu (UPP) ti madahka diri deka segulai enggau GPS.

Taja pan baka nya, Parti Islam Se-Malaysia (PAS), asal ari Semenanjung Malaysia, agi megai penemu nyadi parti ngatika diri.