Tanah NCR Bidayuh ke udah bisi dokumentasyen meseti disukat
KUCHING: PerintahNengeri deka terus nyukung inisiatif dokumentasyen tanah adat (NCR) Bidayuh.
Kepala Menteri Datuk Patinggi Abang Johari Tun Openg madah tanah ke udah bisi dokumentasyen nengah inisiatif DBNA meseti disukat.
Dikena ngemujur pengawa nya, iya deka meri agih belanja ngambi ulih nentu tanah ke udah digaga dokumentasyen ulih disukat lalu di beri pala tanah enggau lengkas
“Enti udah bisi dokumentasyen lalu tanah deka disukat, sukat aja. Enti dekaka surat pala tanah bepelasar adat, kitai ngeluarka pala tanah.
“Munyika tuduh menteri, pengawa tu lubah aku enda nemu. Sekalika nadai chukup tim nyukat tauka nadai duit.
“Enti nya kebuah iya, kitai (Perintah Nengeri) deka nyendia agih belanja ungkup ngelengkaska pengawa,” ku iya.
Abang Johari mansutka jaku nya rambau bejadi Simposiun Budaya Bidayuh 2018 ke diatur di Balai Mayuh Guna DNA ditu, kemari.
Meratka pekara nya, iya madah deka ngangau aum ‘khas’ ngambi tau bejuraika sentang pekara nya dalam awak ke semak.
Ngenang kaul ke sama, Abang Johari madah pengudah surat pala tanah diberi, kuasa ba tanah nya sigi ba orang bempu tanah.
“Sekali orang bempu tanah nya deka nyual, ngereja tanah tauka nyadika puku ekonomi, barang ke iya ngadu.
“Enti deka nyual, tentuka kita nyual ngagai bansa asal ngambika status tanah nya enda ditukar. Pekara nya pia ngambika aset (Bidayuh) enda lenyau.
“Tang aku pechaya Bidayuh udah chukup pintar, kita enda deka nyual tanah,” ku Abang johari.
Dulu agi ari nya, Ketuai Penyandin Penemu DBNA Dato Sri Michael Manyin madah pengawa nyukat tanah ke udah digaga dokumentasyen baka ke enda diadu agi.
Ku iya ke mega Menteri Pelajar, Sains enggau Pansik Teknologi, inisiatif ke dipun ba taun 2007 nya udah nyendia dokumentasyen tanah ba lebih 100 genturung pendiau Bidayuh.
“Tang nyentukka diatu, semina 2 iti genturung pendiau iya nya Sekuduk enggau Pisa aja ke udah disukat Opis Tanah enggau Penyukat (JTS),” ku Manyin.
Bela datai Presiden DBNA Datu Ik Pahon, Menetri Muda Pemansang Tanah Adat Datuk Roland Sagah enggau orang bukai.