Perintah Sarawak ngarapka juluk nya ulih dijapai lebih agi ba pesisir
LIMBANG: Perintah Sarawak bisi tagit deka nyendiaka bekal kuasa karan ngagai selampur menua Sarawak manggai taun 2020.
Menteri Muda Elektrik Menua Pesisir Dr Abdul Rahman Junaidi madahka Perintah Sarawak dibaruh pegai Kepala Menteri Datuk Patinggi Abang Johari Tun Openg dekaka bekal kuasa karan disambung ngagai serap menua kelebih agi di kandang menua pesisir datai ba taun 2020, dibida tagit tumu taun 2025.
“Bungkur bekal kuasa karan ti disambung ba Sarawak kandang diatu urung 91 peratus ungkup peranak menua pesisir.
“Nya kebuah kepala menteri (Abang Johari) dekaka perengka guna tu dirumban dikena nentuka peranak Sarawak nyapai bekal kuasa karan datai ba taun 2020,” ku iya lebuh bejadika Projek Bekal Kuasa Kran Menua Pesisir ba Rumah Taijing, Sungai Puru, Lubai ditu, kemari.
Sama bisi datai bini iya, Siti Shorgayah Ahmad Zaidin, ADUN Batu Danau Paulus Palu Gumbang enggau bini Mary Sindang, Direktor Bekal Kuasa Karan Sarawak Syed Mohd Fauzi Shahab enggau Tuai Rumah Taijing Tamin.
ADUN Pantai Damai nya madahka tebal agi kandang menua pesisir bekenaka pemansut bekal kuasa karan alternatif baka hibrid enggau SARES ungkup kandang menua ulu.
“Ba Batu Danau, sepenyampau RM9.4 juta diagih dikena melanja projek SARES ti meri pemaik ngagai 163 ruang bilik ba enam genturung pendiau.
“Genturung pendiau tu nyengkaum Long Napir, Long Sulong, Long Rayeh, Long Tegaan enggau Long Kartadam,” ku iya.
Ku iya, projek BELB di Rumah Taijing Kampung Puru dipejalaika perintah enggau belanja penyampau RM75,000 ngambika 12 ruang bilik ulih ngasaika bekal kuasa karan.
Seraya kereja nyambung bekal kuasa karan ngagai Rumah Agan enggau Lawai beungkus RM4.5 juta ti deka meri pemaik ngagai 49 ruang bilik dipelaba tembu ujung taun tu.
Berebak enggau pengawa sehari nya, Dr Abdul Rahman bisi ngemendarka geran perintah penyampau RM5,000 seraya Paulus ngemendarka geran perintah sepenyampau RM30,000 ngagai Rumah Tajing.
Bungkur bekal kuasa karan ti disambung ba Sarawak kandang diatu urung 91 peratus ungkup peranak menua pesisir. Dr Abdul Rahman Junaidi Menteri Muda Elektrik Menua Pesisir