Sekeda kandang endur di Kota Samarahan ditinggang ujan batu
KUCHING: Sekeda kandang endur di Kota Samarahan lemai kemari ditinggang ujan batu.
Dulu ari nya, bisi nyadi ujan besereta kudi berengkah urung pukul 4 lemai lalu ngetu enda lama, pia ku peranak ke diau dia.
Ujan kudi ke nyadi di Sarawak nyelai dibida enggau siti penyadi kala nyadi ba USA tang sida ngasaika iya sekali dalam betaun pengelama.
Rayat menua tu ke meda pekara ti nyadi kemari berumban bekunsika pekara diasaika iya ba media rama baka facebook enggau raban berandau (chat group).
Ngumpul batu kudi ti labuh ngagai laman rumah sida enggau ningang kerita nyadi gambar ti dikunsi kelimpah bisi mega sekeda lanchat bekunsika video. Bisi siku dua mega nganjung gambar perabung ti pesuk ngagai bala bakih enggau kaban belayan sida.
Kena 16 September 2012, The Borneo Post bisi ngeripot ujan kudi ti nyelai mangka sebagi ari menua Kuching.
Ripot nya madahka pengempu kedai enggau mensia mayuh di palan dagang besai Central Park ditu begau lebuh ujan kudi mangka kandang menua nya pengudah ujang bangat ngalih hari nya.
Beratus tekang batu kudi pemesai igi kachang labuh ninggang entukar enggau perabung sereta ba jalai alun enggau lupak pejalai kaki.
Sekeda tekang batu kudi bisi ngundan pupu angin ti meku ba tengah iya.
Taja pia, ujan kudi semina lima minit aja lalu jampat lela begulai enggau ujan.
Nyitar mega bisi mangka pengelama sejam setengah sebedau ujan teduh.