Gerawat nyuaka geran RM187,000 ngagai 16 bengkah NGO di Marudi
MARUDI: Sapit Speaker Aum Kunsil Nengeri (DUN), Datuk Gerawat Gala ti mega Kaban Kunsil Nengeri (ADUN) Mulu udah nyuaka geran agih belanja Projek Mit Pemansang Menua Pesisir (MRP) ngagai 16 bengkah gerempung ukai dikuasa perintah (NGO) nyengkaum Komiti Pemansang enggau Pengelikun Genturung Pendiau (JKKK) enggau serakup ditu, malam kemari.
Pengawa nyuaka MRP nya diatur di sebuah restoran ditu ti ngaul geran sepenyampau RM187, 000.
Antara serakup enggau JKKK ti nerima geran nya iya nya Serakup Indu Dayak Sarawak (SIDS) Unit Sungai Sengkabang RM2,000, SIDS Unit Sebatang (RM3,000); SIDS Unit Rumah Damu, Sungai Muam (RM2,000), SIDS Unit Rumah Randie (RM3,000); SIDS Unit Sungai Dabai (RM2,500); SIDS Unit Rumah Sandom (RM15,000); Biro Indu Rumah Sayun, Sungai Arang (RM3,500); JKKK Rumah Penghulu Benang (RM5,000), JKKK Sungai Dua ( RM5,000), JKKK Rumah Ason, Sengkabang Bukit (RM2,000); Rumah Anja Selejau Baru Marudi (RM54,000); JKKK Rumah Vincent (RM35,000), JKKK Rumah Lansam (RM2,000); JKKK Rumah Slat, Sungai Pasir ( RM3,000) enggau JKKK Kampung Padang Kerbau B (RM50,000).
Dulu ari nya ba jaku dipansutka iya, Gerawat ngelalau bala chairman JKKK enggau Unit SIDS ti udah nerima pemeri ngambika ngena geran nya memanah sereta dikena ba sekeda tuju baka ti dipinta sida sebedau tu.
“Aku deka nganjung pengari matau projek ti dipinta, nentuka raban JKKK bejalaika menanah enggau lanchar baka ti diperambu,” ku iya.
Pengawa nya mega disempulang pengerami makai lemai ti bela digulu bala ketuai komuniti baka Pemancha Chong Chin Hui, Penghulu Randie, Penghulu Benang sereta bala ketuai raban bansa ke bukai.