Charles champion Pekit Gumpal Isi 2018

SIBU: Penyereta ari Kuala Lumpur, Charles Luanga mujur ngempu gelar champian ba kategori Men’s Bodybuilding (70 kg ke atas) ba Men of Hammer/Physique Championship 2018.

Pekit ti digulu lebih 30 iku penyereta ari India, Indonesia, Brunei, Sabah enggau Semenanjung Malaysia diatur Solid Gym ba Kingwood Hotel, lemai kemari.

Penuduk lumur dua ba kategori nya diempu Noel Ting ari Solid Gym lalu ditangkan Mohamad Rahemi Abdul Manaf ari Emi Gym, Brunei.

Ba kategori Men’s Bodybuilding (70 kg ke baruh), gelar champian diempu pemekit ari Emi Gym Brunei iya nya Zorizal Johari lalu ditangkan Micheal Md Subhi ti mega ari Brunei ba penuduk lumur dua enggau Roger Wong ari Solid Gym megai penuduk lumur tiga.

Champian kategori Men’s Physique (170 cm ke atas) diempu Allen Lee ari Solid Gym lalu ditangkan Mohammad Nasir Tahir ari Ironman Gym, Brunei ba penuduk lumur dua.

Penuduk lumur tiga ba kategori tu iya nya penyereta ari Sabah, Dismond Ombilod.

Kategori Men’s Physique (170 cm ke baruh) mandangka penyereta ari Jays Classic Fitness, Brunei, Faisal Mohammad ngempu gelar champian.

Penuduk lumur dua diempu Kishew Bunya ari Am Gym, Sarikei lalu ditangkan Mahmud Badar ari Brunei ba penuduk lumur tiga.

Allen Lee sekali agi ngempu gelar champian ba Men’s Physique Hammer Gym ditangkan Roger Wong ba penuduk lumur dua enggau Franklin James ngempu penuduk lumur tiga.