KPM ransing nempa modal mensia bepenemu KBAT
Nya alai KPM ngeletak menua tu deka mujur nempa nembiak sekula ti bepenemu sereta pintar runding
SIBU: Opis Menteri Pelajar Malaysia (KPM) udah ngeletak menua tu deka mujur nempa nembiak sekula ti bepenemu sereta nyadi modal mensia tikas tinggi.
Pemesai Opis Pelajar Kanowit Bugin Ragon madah, perintah ransing ngubah sistem pelajar nengah Langgur Pemansang Pelajar Malaysia (PPPM) ti lebih ngemeratka pekara kreativiti enggau inovasi.
“Bepun ari nya, Pengelandik Berunding Tikas Tinggi ( KBAT) dipejalaika ba sekula ti mungkur kokurikulum, pathalogi, peresa, asil sukung komuniti’, ko-kurikulum enggau pengelandik pengajar.
“Diatu kitai ulih meda program KBAT ba kelas ti udah disungkak agi nen- gah Program I-Think, iya nya siti program ti nyaup sekula ngemeranka pengelandik berunding, nerenak ulah belajar sepanjai umur, bepengelandik mutar penanggul enggau chara kreatif ti nyadi ba nembiak.
“Ari program tu kitai ulih nempa nembiak ti mujur dudi hari nengah runding ti kreatif sereta inovatif,” pia ku iya madah.
Iya mantaika jaku tu maya bejadi Pengerami Hari Pengajar 2018 Pelilih Kanowit ba sebuah hotel tebilang ditu, empai lama tu tadi.
Bugin mega madah, pengajar mega patut semampai nambah tikas intelektual enggau penemu ti tinggi ketegal ti nyadi ejen nempa modal mensia menua.
“Seraya kitai betapi enggau penguji ti datai, perintah mega udah numbuhka siti chara ngajar ke baru iya nya ‘Pembelajaran Abad Ke-21 @ PAK21,” ku iya madah baru.
Ku iya, Opis Menteri Pelajar udah bejalaika program nya berengkah ari 2014 iya ke ngemeran pekara komunikasyen, kolaboratif, runding kritis, kreativiti, aplikasyen nembiak enggau ulah.
“Semua pekara tu beguna ba atur pelajar abad ke-21 tauka PAK 21.
“Nya alai semua tu dipejalaika kitai dalam kelas,” ku iya madah.
Pengerami Hari Pengajar 2018 Kanowit disempulang enggau macham program nyengkaum program meri darah enggau program beripai.
Sama bela datai iya nya Pemantu Pemesai Opis Pelajar Kanowit Robert Chendang Nyalu, Prinsipal SMK Kanowit Abang Ahmad Abang Abdul Wahab sereta bala bukai.
Diatu kitai ulih meda program KBAT ba kelas ti udah disungkak agi nengah Program I-Think, iya nya siti program ti nyaup sekula ngemeranka pengelandik berunding, nerenak ulah belajar sepanjai umur, bepengelandik mutar penanggul enggau chara kreatif ti nyadi ba nembiak. Bugin Ragon Pemesai Opis Pelajar Kanowit