Isu status peranak menua siti ari peminta PEN ngagai perintah baru
MIRI: Penan Empowerment Network (PEN) udah mantaika isu status peranak Orang Asal nyadi siti ari deklarasyen dipinta ngagai perintah baru Pakatan Rakyat (PH), apin lama ke udah.
Chairperson PEN Elia Bit madahka pekara nya udah dibantai ngagai bala pengari rayat PH rambau gempuru besai Jaringan Orang Asal SeMalaysia (JOAS) di Bau tu tadi.
“Penanggul dokumen nya udah dibantaika aku ngagai Kaban Parlimen (MP) Puncak Borneo Willie Mongin enggau MP Mas Gading Mordi Bimol rambau pengawa bejadika JOAS.
“Pia mega, iya diterima lalu nerima perati manah ari kededua pengari nya,” ku iya nengah WhatsApp ngagai Utusan Borneo kemari.
Ku Elia, Willie Mongin ba jaku bejadika JOAS ti dipansutka iya enda ngenggaika agi bisi lebih ari 75,000 kes nadai ngembuan dokumen pengelala diri raban Orang Asal Sarawak kelebih agi bansa Penan.
“Ku iya (Willie), pengari rayat PH Sarawak deka nagih ngambi sebuah gempung khas ditumbuh di baruh perintah nya ti deka gawa ngatur enggau ngintu pekara dipinta Orang Asal.
“Pia mega penemu Mordi, iya madahka penanggul dokumen pengelala diri deka seruran nyadi pekara berat ti diperati perintah PH diatu,” ku iya nambah.
Kena Jun tu tadi, PEN bela gawa nyaup 50 iku datai ari pupu bansa ari Ulu Baram ngisi peminta tingki di Opis Pengerejista Bansa (JPN) di UTC Miri.
Pengawa tu dikena ngintu pengelantang sida ngulihka dokumen pengelala diri ngambika sida muntang ngatur pengawa besehari sehari ila.