Program Randau Tanah Adat NCR di Sibu mujur
SIBU: Program Randau Tanah Adat NCR-The Hidden Truth ke diatur Parti Bansa Dayak Sarawak (PBDS) Sitak Tengah mujur digulu 60 iku penyereta.
Program tu diatur ba Indu Opis PBDS Sitak Tengah di Sibu Jaya, kilah ensana.
Moderator program, Chairman Parti Bansa Dayak Sarawak (PBDS) Sibu Julius Enchana maya tu bisi mantaika isu bekaul enggau tanah adat Bumiputera ( NCR) sereta kaul iya enggau Adat Iban nyengkaum polisi perintah menua Sarawak.
Iya madahka perintah nengeri enda patut ngirit rayat ngagai Kort Tinggi nyema perintah alah bechara ngelaban rayat ba menua tu.
Nambahka nya, iya bela bekunsi ngagai mensia mayuh jerita pemindah Iban ari Batang Kanyau urung taun 1600 ti udah berumpang menua Sarawak seraya ngelansa polisi tanah maya pegai James Brooke, Jipun enggau Bristih Colony sebedau Malaysia ditumbuh ba taun 1963.
Awak tu mega dikena Julius minta Opis Tanah enggau Servei meri penerang bekaul enggau sebengkah surat ti dikeluarka opis sentang pengawa meri tanah ngagai Bumiputera Islam aja.
Ba program tu mega, Ket- uai Raban Nembiak PBDS Rapelson Richard Hamit nerang ke pemesai guna ‘ community mapping’ ti dikena ngelai enggau ngetan hak ba tanah NCR.
Ketuai Raban Indu PBDS Slyvia John nerangka hak Sarawak bepelasarka Sempekat Malaysia 1963 (MA63) enggau kaul kod tanah Sarawak 1958.
Program tu bela ngangauka Dayak Nation Institute ( DANI) ti diarika Bobby William nerangka tanggungpengawa sida ti mansik sereta meri servis ngagai bansa Dayak.
Mensia mayuh ke bisi datai bela mendingka penerang ari Mathew Jeluing (PBDS Land Bureau) bekaul sekyen tanah enggau empas iya ngagai NCR.
Penerang iya maya nya bisi nyebut penyarut ke suah nyadi ketegal isu Provisional Lease (PL), ubah ba Seksyen Tanah 6A bekaul enggau ‘Usufructuary Rights’.
Program sehari nya bela disukung Chairman TERAS Bukit Assek Pasang Ngalambai, Sekretari TERAS Julau Kaya Uset, Sekretari Besai STAR Simon Tiong enggau Mandal Chairman Gerempung Dayak Dudong (PDD) Frankie Nyalau ti mega Sapit Sekretari Parti Progresif Demokratik ( PDP) Sitak Tengah.