‘Ngarum Lagu Bidayuh’ deka diatur kena 24 Nov
KUCHING: Anugerah muzik Bidayuh keterubah deka diatur dikena meri basa ngagai raban artis enggau pemuzik Bidayuh kena 24 November taun tu.
Diatur Serakup Pemuzik enggau Artis Bidayuh ( BAMA), pengerami diberi nama ‘Ngarum Lagu Bidayuh’ ( NLB) 2018 deka diatur bepalan ba balai mayuh guna Serakup Bansa Dayak Bidayuh ( DBNA) ditu.
Presiden BAMA Dr Alim Impira madahka NLB18 ngelaika evolusyen industri muzik Bidayuh ti diatu nyauka manggai lima puluh taun
Ku iya, industri muzik Bidayuh berengkah kenyau ari pengawa ngeluar album keterubah ari Richmond Allan Morshidi, dalam taun 1970 an.
“Tu Anugerah Muzik Bidayuh keterubah, tuju iya deka ngelala sereta masa pemanah kereja enggau lagu kreatif ditengkebang bala pemuzik enggau artis Bidayuh ungkup timpuh 1 November 2016 nyentuk 15 September 2018.
“Enggau konsep ‘ red carpet table dinner’, tikit makai lemai ungkup bala temuai berega RM40 siku tauka RM400 semija,” ku iya.
Iya mega madahka langkar kereja NLB ba kategori anugerah enggau kriteria ditimbang ari Anugerah Muzik Dayak ( AMD), anugerah tiga taun sekali ungkup bala artis enggau pemuzik Iban, Bidayuh enggau komuniti Orang Ulu.
NLB deka bejalaika pangku pengawa nyadi pintu penama chukup bada ngagai pengari Bidayuh ngagai AMD.
Taja pia, bala artis enggau pemuzik Bidayuh ti ngatika diri nyangka deka milih ngenamaka diri terus ngagai AMD, ku iya nerang.
Penyereta nadai bebayar, NLB18 nyediaka 19 kategori anugerah direbut disempulang enggau trofi anugerah NLB18.
Ari 19 anugerah, 4 kate- gori ( Pemadu Manah Vokal Lelaki, Pemadu Manah Vokal Indu, Pemerindang Pemadu Nyulut enggau Artis Baru Pemadu Manah) patut dipilih belalauka pengawa merindang atas panggau renggat kepenudi.
“Kesemua kategori anugerah deka ditimbang dua iku panel juri ba renggat saringan enggau renggat panel, tetiap pekara dikira nitihka peneleba ari BAMA nyadi pengari kediri ari gempung ukai dikuasa perintah ungkup bala artis enggau pemuzik Bidayuh.
“Hari bulan kepenudi nganjung pom bepekit kena 15 September 2018,” ku iya.