Anang paking sebarang ba LTS, guna mih palan ke udah disedia
SIBU: Paking nadai pemendar ba dalam enggau luar begunan palan penyangkai bilun Sibu (LTS) ditu ngasuh bala orang tambang enda lantang sereta nanggul sida bebaikka kantung kelimpah ngeruga pengelikun ngagai sida ti betengahka jalai alun ngagai endur bukai.
Maya jam sekut, sida ti paking nadai pemendar ngasuh padang bilun sekut. Jam sekut ninting hari – dua kali, pagi enggau lemai.
Tiga lot paking diungkup ngagai bas mega direbut mensia mayuh.
Pekara tu majak nyadi taja bisi paking kerita disedia dia.
Belalauka pekara ku, Menijar Padang Bilun Malaysia Sibu, Zainuddin Abu Nasir ngelalau mensia mayuh nguna zon paking kerita, ti ulih nampung 500 buah entukar ba sebarang maya.
“Ari perati kitai sehari tu, semina 191 lot aja udah dikena, 309 lot agi puang. Bisi 19 buah entukar paking enggau nadai pemendar,” ku iya.
Iya beratika bisi mega entukar dipaking sengapa ba tisi jalai ba zon paking.
Zainuddin ngarapka mensia mayuh enda bekenaka media rama mantaika isu tu enggau nadai nemu pun penanggul tu nyadi, iya nya paking kerita sengapa endur di dalam enggau luar penyangkai padang bilun, taja suah ditangkan.
“Kami udah suah madah ngagai mensia mayuh paking ba zon paking ti udah disedia. Bisi sekeda sida chukup meriti ke alai semina nyangkaika orang aja lalu ngejang. Bala staf paking kerita bejalai gawa sereta ngasuh sida (deriba ti paking sengapa alai), tang kami enda ulih bejaga belama. Kelai udah chukup terang madah ngagai mensia mayuh, tang suah enda dipending.
Iya nerang, batang pangku pengawa staf paking kerita nentuka injin enggau kereban ulih dikena ungkup bala sida ti begunaka paking kerita.
Enti sema bisi sebarang penanggul ba kereban, sida meseti nukar ngagai chara manual, nyengkaum ngambi bayar.
“Bisi maya bala staf tu mega nyaup bepadah ngagai pengempu kerita enti sema sida enda nambit pintu tauka jenila kelimpah ngangauka mekenik ari SibuJaya enti sema bisi entukar rusak.
“Bisi penyedar enggau perati mensia mayuh chukup beguna lalu kami ngarapka komuniti ba media rama bejalaika pangku pengawa sida memanah. Polis mega suah bejalai gawa laban bisi kerita ngempang jalai di luar palan penyangkai, ngeruga pengelikun sida ti betengahka jalai alun ke bukai,” ku Zainuddin nambah.
“Taja pia, polis mega bisi pangku pengawa bukai kelebih agi maya jam jalai sekut, ngatur peminta mensia mayuh baka sida ti deka ngaga ripot ba padang bilun.” ku iya madah nyemetak.
Iya mega beratika polis trafik ari pasar Sibu mega seruran bisi nyaup bala bakih sama gawa ari SibuJaya.