Orang tuai patut ngemeran daya idup ti bepengerai
SARIKEI: Sida ke udah lunggar umur dilalau ngemeranka daya idup bepengerai sereta seruran ngemeranka aktiviti mansutka peluh dikena nentuka batang tubuh sida meruan regas, taja umur majak lunggar.
Residen Bagi Menua Sarikei, Mohamad Junaidi Mohidin madah, taja pia, orang tuai diperansang mansutka peluh ari kereja lempung nitihka penau tubuh sida lalu ukai aktiviti ti tau ngachau pengerai bukai.
“Menua kitai diatu benung nyingkang ngagai status Menua Tuai datai ba taun 2030, enggau 15 peratus ari peranak deka manggai umur 60 taun enggau tuai agi.
“Belalauka banchi ti dipejalai dalam taun 2014, orang tuai di menua tu urung 2.65 juta iku tauka 8.8 peratus ari kesemua penyampau tubuh 30.1 juta rayat Malaysia.
“Dikena mutarka pekara demografi tu, semua raban patut begempung nempa rampa rama, ekonomi enggau pengerai ti engkeman ungkup pengelantang idup sida ke tuai enggau Polisi Orang Tuai Menua ti nagit orang tuai ulih ngatika diri, regas, chakah gawa sereta produk- tif,” ku iya.
Mohamad mansutka jaku nya lebuh Pengawa Nutup Mini Karnival Sesais Orang Tuai Talent 2018, lemai kemari.
Program tu udah diatur di Balai Mayuh Guna Kampung Baru Seberang Sarikei lalu udah digulu urung 1,000 iku.
Bemacham aktiviti udah diatur sepanjai atur program baka senamrobik, kaunter pengawa mandang enggau pengerai, pekit tanda, pekit belagu enggau aktiviti ke bukai.
Program tu diatu Opis Pengerami Komuniti Bagi Menua Sarikei.