PBT ejensi ke pemadu semak enggau komuniti

BINTULU: Raban Kaunsil Kandang Menua (PBT) pemadu semak enggau komuniti megai pangku pengawa nyediaka servis pemun enggtau perengka guna pemadu manah nyengkaum pengawa ngintu jalai alun, endur mensia mayuh, parit, ngumpul uras, nebas babas enggau servis kandang mengeri ke bukai lalu begunaka pengawa ngenatai ngagai tikas pemadu tinggi, efektif, efisien ngagai bala penguna.

Menteri Muda Kaunsil Kandang Menua Datu Dr Penguang Manggil madah rayat diatu ngandalka mayuh agi ari sebedau tu ngambika servis ti bisi kualiti, mayuh gaya, pemaik, bansa, fleksibiliti, meruan agi sereta servis gawa.

Ku iya, kitai patut nangkup peminta bala komuniti ba infrastruktur, servis mengeri enggau perengka guna bukai taja kitai suntuk orang gawa enggau penau ba pekara belanja laban enti enda tetangkupka peminta nya deka meri kelai enda manah ngagai semua raban perintah.

“Ari gaya pekara ti nyadi enggau peminta revolusyen industri 4.0, aku pechaya kitai patut nyadi gempung ti nyelinting komuniti, ngemai mayuh agi kaul raban bisi pemerat, peminta mensia mayuh lalu ukai semina nangkup peminta kitai aja,” ku iya ke lalu nyadi Kaban Kunsil Nengeri (ADUN) Marudi ti ngarika Menteri Kaunsil Kandang Menua enggau Pengawa Berumah, Datuk Dr Sim Kui Hian rambau Pengerami Makai Lemai Beserimbai Enggau Lumba PBT 2018 di Restoran Dinner World, Bintulu Sentral malam kemari.

Sama bisi datai Menijar Besai BDA Rodziah Morshidi, Penulung Menijar Besai (Servis Rampa Menua) BDA ke lalu nyadi Chairman Pengatur Lumba PBT 2018, Wan Ibrahim Wan Ali, bala pengari Datuk Bandar kaunsil sereta kaunsil mengeri besai, bala ketuai kunsil opis pelilih menua enggau bala temuai bukai.

Kelimpah ari nya, iya mega ngansak opis menteri enggau PBT meri pemerat mayuh agi ba pengawa ngintu sisa pepejal kelebih agi di kandang menua pesisir.

“Pengawa ngintu teda ukai semina beguna amat di mengeri tang mega di kandang menua pesisir, ambi ke chunto di rumah panjai ke alai penanggul ba perengka pengangkut ditapi lalu budaya ngena baru kereban mega baru datai.

“Pengawa bebuaika uras ti nadai betatak sereta nadai nitihka atur enggau sepeneka ati enti diteju pia aja ukai semina deka meri pangka enda manah ngagai rampa menua aja, tang mega meri pangka ngagai pengerai mensia mayuh enggau pengelantang ekonomi-rama bala komuniti kitai,” ku iya nerang.

Nya alai ku iya, kitai patut bendar agi gawa enggau inisiatif kurang agi bekenaka plastik, teda ukai biodegradasi enggau ke bukai sereta nyeridi bala komuniti ngambi kurang agi bebuaika teda domestik ari pemansut.

Ku iya, enti kitai bejalai meri servis di kandang menua diri, enda entu patut tepantup ati enggau status quo tang patut ngemanah sereta ngangkatka gi struktur, atur pengawa enggau atur pejalai pengawa ti ulih nangkup pengandal rayat.

“Kitai meseti muai sebarang ulah birokrasyen ti enda ibuh ngaul atur pengawa tauka atur pejalai pengawa ti melit sereta sindrom kuasa kaunsil dalam institusyen kitai. PBT enggau ejensi bukai di baruh opis menteri patut berunding di luar kotak enggau kreatif ngambi ‘berinovasi’ produk baru iya nya servis enggau pemansut asil belanja dikena ngenegapka agi penuduk belanja,” ku iya nambah.

Ku iya, PBT anang kelalu bepanggai ba geran perintah enggau pengawa mayar keluar nyadi sebagi ari perintah besai badu agi baka pekara ke diatu tang tu nyadi tanggungpengawa kitai.

Ba industri 4.0 enggau jeman digital ku iya, dikena ngangkatka pemanah nama kelebih agi ba pengawa ngenataika servis enggau meri nama baru ngagai institusyen PBT, kitai patut meruan ulih besemekih sereta relevan.

Ngelansa pasal lumba nya ku iya, bisi 28 tim datai ari 2,221 iku pesereta udah begelumu pengelama empat hari, ari 9 nyentuk 11 Ogos di mengeri Bintulu ngemujurka karnival lumba keempat ungkup taun tu enggau 17 atur pekit.

“Penyereta ba lumba tu ukai semina deka menang enggau nyadi champion aja, tang dikena nerenakka semengat gawa siti tim, bekelala enggau ngerapitka agi pemanah kaul antara PBT sereta mega nerenak enggau nempa pengandal diri, nempa disiplin tinggi, nerenak pemanah ulah belalauka asil enggau ulah kiruhka diri sebakih dalam tim,” ku iya.

Kelimpah ari 26 PBT, karnival tu nega disereta Opis Pemansang Pengawa Berumah ( HDC) enggau Opis Parit enggau Entali Ai Sarawak (DID).