SWP nerima manah pemutus ngemaduka program PLKN
SIBU: Pemutus perintah ngemaduka Program Latihka Bansa (PLKN) nerima timbal manah ari Sarawak Workers Party (SWP).
Presiden SWP Munan Laja madah, program nya ngelama tu enda engkeman diatur ngagai bala nembiak ke udah tembu Form 5.
“Nembiak Form 5 tauka Form 6 nundaka patut beratka pejalai pelajar sida ngagai tikas ti tinggi agi tauka ngiga pengawa tang ukai ngambi bagi ba PLKN.
“Kitai enda ulih nempa nembiak talukka menua (nationalis) dalam kandang tiga bulan aja baka timpuh ti diletak PLKN ngelama tu,” pia ku iya madah ngagai pengarang berita, kemari.
Iya mantaika jaku tu maya nimbal penerang ari Menteri Raban Nembiak, Lumba Enggau Main Syed Saddiq Syed Rahman ti madahka perintah udah setuju ngemaduka PLKN.
Kelimpah PLKN, Biro Tata Negara (BTN) mega diketuka.
Pemutus nya digaga bepun ari pemutus kabinet minggu siti tadi sepengudah beratika PLKN enggau BTN enda engkeman dipejalaika agi.
Taja pia, Syed madahka dua iti program nya deka disilih enggau program baru ti deka beratka raban nembiak ti bejuluk ati tinggi.
Penerang nya dibantaika iya ba media maya aum media di Parlimen, kemari.
Nambahka jaku iya baru, Munan madah, program PLKN semina ulih mujur digaga nyema dipejalaika ba nembiak ari pun baka berengkah ari Form 1 nyentuk Form 6 iya nya dalam kandang enam taun.
“Reti iya program tu tau diajar di sekula ti dipejalai nengah program ekstrakurikulum sekula.
“Timpuh tiga bulan kelalu serekat enti kitai deka nerenak ulah talukka menua ba bala nembiak,” ku iya madah baru.
Munan madah, ba penemu SWP, enti PLKN nadai agi, aset enggau orang ti gawa ba PLKN ba nengeri Sarawak tau diserah ngagai Opis Menteri Betanam Betupi Malaysia.
“Aset enggau raban ke gawa ba PLKN tau dikena matih rayat ba nengeri tu ba pekara betanam betupi laban kitai di Sarawak agi jauh tinggal ba pekara tu,” ku iya madah.